مانسہرہ: وزیر اعلی محمود خان نے شوگران میں سیاحتی مقامات تک سڑکوں کی تعمیر کے تین مختلف منصوبوں کا افتتاح کیا،ان سڑکوں میں شوگران، گھنول پابرنگ اور مانور ویلی روڈز شامل ہیں ۔
ان سڑکوں کی مجموعی لمبائی 35 کلومیٹر ہے،ان سڑکوں کی تعمیر پر 14 کروڑ سے زائد کی لاگت آئے گی۔
وزیر اعلی محمود خان نے اس موقع پر اپنے خطاب میں کہا کہ سیاحتی مقامات تک سڑکوں کی تعمیر سے علاقے میں سیاحت کو فروغ ملے گا،مقامی لوگوں کو روزگار کے مواقع میسر آئیں گے، صوبائی حکومت وزیر اعظم عمران کے وژن کے مطابق سیاحت کے فروغ کےلئے مربوط حکمت عملی کے تحت اقدامات اٹھا رہی ہے.
ان کا کہنا تھا کہ نئے بجٹ میں ہزارہ کے مختلف سیاحتی مقامات تک سڑکوں کی تعمیر کے لئے 2400 ملین روپے کی رقم مختص کی گئی ہے، کائیٹ پراجیکٹ کے تحت سیاحتی مقامات کے لئے 370 کلومیٹر روڈ انفراسٹرکچر تیار کیا جا ریا ہے، کورونا کی مشکل صورتحال کے باوجود صوبے میں ترقی کا سفر جاری رکھیں گے.
وزیر اعلی نے کہا کہ ہزارہ ڈویژن میں سیاحت کو فروغ دے کر علاقے کی تقدیر بدل دیں گے،صوبے میں سیاحت کے فروغ کے لئے ٹوارزم اتھارٹی کا قیام عمل میں لایا گیا ہے،نئے ٹورازم زونز قائم کئے جا رہے ہیں،کورونا صورتحال سے دیگر شعبوں کی طرح سیاحت کا شعبہ بھی بری طرح متاثر ہوا ہے.
محمود خان نے کہا کہ سیاحت کے شعبے کو کھولنے کے لئے ایس او پیز تیار کئے گئے ہیں، عید الاضحی کے بعد وفاق اور دیگر صوبوں کی مشاورت سے سیاحت کے شعبے کو کھولنے پر کام کر رہے ہیں.