ویب ڈیسک(اسلام آباد):وزیر خارجہ مخدوم شاہ محمود قریشی دبئی میں دو مصروف ترین دن گزارنے کےبعد ابوظہبی روانہ ہوگئے ہیں۔
ذرائع کے مطابق ابو ظہبی میں وزیر خارجہ کی ملاقات ان کے اماراتی ہم منصب شیخ عبداللہ بن زاید النہیان سمیت دیگر اہم قیادت سے ہوگی،ان ملاقاتوں میں دو طرفہ تعلقات، مختلف باہمی دلچسپی کے شعبہ جات میں دو طرفہ تعاون کے فروغ ،بالخصوص دو طرفہ تجارت کے حجم میں اضافے کے حوالے سے تبادلہ ء خیال کیا جائے گا۔
وزیر خارجہ، اپنے اماراتی ہم منصب کے ساتھ مجموعی علاقائی صورتحال اور باہمی دلچسپی کے حامل، بین الاقوامی امور پر بھی تبادلہ خیال کریںگے اور مقامی و بین الاقوامی میڈیا نمائندگان سے بھی گفتگو کریںگے۔
توقع ہے کہ وزیرخارجہ کا دورہ ء متحدہ عرب امارات، دونوں ممالک کے مابین دیرینہ برادرانہ تعلقات کو مزید مستحکم بنانے اور دو طرفہ اقتصادی تعاون کے فروغ میں انتہائی معاون ثابت ہو گا۔
