پشاور کے علاقے ارمڑ میانہ میں اشتہاری ملزمان اور پولیس کے مابین فائرنگ کا تبادلہ ہوا جس کے نتیجے میں ایک اشتہاری جاں بحق جبکہ ایک پولیس اہلکار شہید ہوگئے۔
ایس ایس پی آپریشنز کے مطابق آپریشن صبح سویرے کیا گیا جس میں ایک اہلکار شہید جب کہ جوابی کارروائی میں اشتہاری ہلاک ہوگیا۔ اشتہاری شخص کے لواحقین نے ترناب فارم باڑہ پل کے پاس روڈ بند کر دیا اور نعش روڈ پر رکھ کر احتجاج شروع کردیا۔
دوسری جانب پولیس مقابلے میں شہید اہلکار کی نماز جنازہ پولیس لائن پشاور میں ادا کر دی گئی ہے پولیس کے دستے نے شہید کو سلامی پیش کی، نماز جنازہ میں ایڈیشنل آئی جی ،سی سی پی او ، آئی جی اسپیشل برانچ ،ڈی آئی جی سی ٹی ڈی اور دیگر اعلی پولیس افسران نے شرکت کی۔