سری لنکا اور پاکستان کے درمیان جاری دو ٹیسٹ میچوں کی سیریز کے گال میں کھیلے جا رہے دوسرے ٹیسٹ میچ کے دوسرے دن پاکستان کی ٹیم سری لنکا کی پہلی اننگز کے سکور 378 رنز تمام کھلاڑی آئوٹ کے جواب میں دوسرے دن کھیل کے اختتام تک سات وکٹوں کے نقصان پر 191 رنز بنا پائی ہے جبکہ اسے پہلی اننگز کا خسارہ پورا کرنے کیلئے مزید 187 رنز درکار ہیں،
پاکستان کی جانب سے سلمان علی آغا نمایاں بیٹر رہے جنہوں نے 62 رنز کی اننگز کھیل کر ٹیم کو کسی حد تک سنبھالا دیا، امام الحق 32، محمد رضوان اور فواد عالم 24، 24 رنز بنا پائے جبکہ کپتان بابر اعظم سولہ اور پہلی ٹیسٹ میچ کے ہیرو عبداللہ شفیق بغیر کوئی سکور بنائے پویلین لوٹے، سری لنکا کی جانب سے سب سے کامیاب بائولر رمیش مینڈس رہے جنہوں نے تین وکٹیں حاصل کیں جبکہ پراباتھ جے سوریا نے دو، اشیاتھا فرنینڈو اور دننجایا ڈی سلوا نے ایک ایک وکٹ حاصل کی، قبل ازیں دوسرے روز سری لنکا کی ٹیم اپنی پہلی اننگز میں 378 رنز بنانے کے بعد آئوٹ ہو گئی تھی، دوسرے دن کھیل کے اختتام پر وکٹ پر یاسر شاہ تیرہ رنز کے ساتھ موجود تھے۔
