ویب ڈیسک: وفاقی وزیر اطلاعات و نشریات عطا اللہ تارڑ نے کہا ہے کہ پشتون تحفظ موومنٹ کی گزشتہ چھ ماہ کی سرگرمیاں ملک مخالف رہیں ۔
پریس کانفرنس کرتے ہوئے عطاء تارڑ نے کہا کہ پشتون تحفظ موومنٹ نے نہ صرف پاکستانی پرچم نذر آتش کیا بلکہ بیرون ممالک پاکستان کے سفارت خانوں پر حملے کئے۔
انہوں نے کہا کہ جب کوئی پابندی عائد کی جاتی ہے تو وہ شواہد پر لگائی جاتی ہے ابھی بھی وقت ہے قومی دھارے میں واپس آئیں، پاکستان کی ترقی کے لئے کردار ادا کریں،پاکستان سے ہماری بقا ہے اور پاکستان ہے تو ہم سب ہیں۔
عطاء اللہ تارڑ نے مزید کہا کہ پشتون تحفظ موومنٹ کو بیرون ملک سے پاکستان مخالف بیانیہ پر فنڈنگ کی جا رہی تھی۔
وفاقی وزیر اطلاعات کے مطابق پی ٹی ایم کے حملوں میں افغان باشندے ملوث پائے گئے سب چیزیں ثابت ہونے پر پی ٹی ایم پر پابندی عائد کی گئی، تحقیقات ہو رہی ہیں کہ پی ٹی ایم کو فنڈز کہاں سے آ رہے ہیں۔
وزیر اطلاعات نے کہا کہ پاکستان کی معیشت مستحکم ہو رہی ہے،روپے کی قدر میں اضافہ اور مہنگائی میں کمی ہوئی پختون ہمارے بھائی ہیں۔
انہوں نے کہا کہ پختونوں کا پاکستان کی ترقی میں اہم کردار رہا ہے کسی بھی تنظیم کو ثبوتوں کی بنیاد پر ہی کالعدم قرار دیا جاتا ہے، کسی بھی سیاسی جماعت کو پاکستان پر حملے اور نظریہ پاکستان کو نقصان پہنچانے کی اجازت نہیں دی جا سکتی۔
انہوں نے کہا کہ پرامن احتجاج کی ہر کسی کو اجازت ہے،پاکستان کی ترقی کے لئے ہر اقدام اٹھائیں گے،کسی کو اجازت نہیں دیں گے کہ وہ ملک کو عدم استحکام کا شکار کرے،ہمارے معاشی اشاریئے بہتر ہو رہے ہیں، عالمی مالیاتی ادارے ہماری معاشی اقدامات کی تعریف کر رہے ہیں۔
عطا تارڑ نے کہا کہ وزیراعظم نے تمام وزرائے سے کہا ہے کہ مہنگائی میں کمی کے اثرات عوام کو منتقل کریں ۔
