ویب ڈیسک :خیبرپختونخوا حکومت نے صوبے بھر کی جیلوں میں موجود قیدیوں کے بینک اکاﺅنٹس اور مزدوری کی سہولت دینے کا فیصلہ کر لیا ہے ۔
آئی جی جیل خانہ جات خیبرپختونخوا عثمان محسود نے اس حوالے سے بتایا ہے کہ قیدیوں کے بینک اکاؤنٹس کھولنے کی منظوری ویلفئیر فنڈ رولز 2023 کے تحت دی گئی۔
پہلی بار قیدیوں کی جانب سے خاندان کی کفالت کے لیے رولز بنائے گئے ہیں اور اب اکانٹس کھولنے کے لیے بینک آف خیبر سے بات چیت جاری ہے۔
انہوں نے بتایا کہ قیدی جیل میں مزدوری کرکے اپنے خاندان کی کفالت کرسکیں گے، قیدیوں کو ملنے والی اجرت کا 10 فیصد حکومت، 30 فی صد قیدیوں کو دیا جائے گا جب کہ 60 فی صد ویلفیئر فنڈ میں جمع ہوگا۔
آئی جی جیل خانہ جات نے مزید بتایا کہ جیلوں میں قیدی قالین سازی، فرنیچر اور چمڑے کے چھوٹے کارخانوں میں مزدوری کرسکیں گے، قیدی پی سی او اور کینٹین میں بھی مزدوری کرسکیں گے۔
