ویب ڈیسک: قومی اسمبلی میں اراکین کی تنخواہوں اور مراعات میں اضافے سے متعلق ترمیم کثرت رائے سے منظور کر لی گئی ۔
وزیراعظم شہباز شریف کی موجودگی میں پیپلز پارٹی نے اراکین پارلیمنٹ کی مراعات بڑھانے سے متعلق ترمیم پیش کی۔
پیپلز پارٹی کے عبدالقادر پٹیل نے مراعات بڑھانے کی ترمیم پیش کی، اراکین اسمبلی کا سفری الائونس 10روپے کلومیٹر سے بڑھا کر25روپے کر دیا گیا۔
ارکان پارلیمنٹ تنخواہ و مراعات ایکٹ میں ترمیم فنانس بل کے ذریعے کی گئی،ترمیم کے مطابق اراکین پارلیمنٹ کے فضائی ٹکٹ استعمال نہ ہونے پر منسوخ کرنے کی بجائے اگلے سال قابلِ استعمال ہوں گے۔
اراکین پارلیمنٹ کی تنخواہوں اور مراعات کا اختیار وفاقی حکومت سے لے کر متعلقہ ایوان کی فنانس کمیٹی کے سپرد کر دیا گیا۔
اپوزیشن نے تنخواہوں اور مراعات سے متعلق پیپلز پارٹی کی ترمیم کی مخالفت کی، بعد ازاں پیپلز پارٹی کی پیش کی گئی ترمیم کثرت رائے سے منظور کر لی گئی۔
