ویب ڈیسک: وفاقی پولیس نے سپریم کورٹ کے باہر احتجاج کرنے پر پی ٹی آئی چیئرمین بیرسٹر گوہر سمیت 20وکلا کے خلاف دہشت گردی کا مقدمہ درج کرلیا۔
اسلام آباد پولیس کے تھانہ سیکرٹریٹ کے ایس ایچ او نے انسداد دہشت گردی ایکٹ اور سنگین دفعات کے تحت درج مقدمہ درج کرایا۔
مقدمے میں لطیف کھوسہ، شبلی فراز، سلمان اکرم راجہ، مصطفین کاظمی، نیاز اللہ نیازی اور اعظم سواتی کو نامزد کیا گیا ہے۔
ایف آئی آر میں نسیم حیدر پنجھوتہ، انصر ایڈووکیٹ، بیرسٹر گوہر اور عبداللہ وزیر کو بھی نامزد کیا گیا ہے۔
مقدمہ متن میں کہا گیا ہے کہ مظاہرین نے سرکاری ادارے کے سربراہ کا پتلا جلایا اور پولیس افسران و اہلکاروں سے مزاحمت کرتے ہوئے انہیں سنگین نتائج کی دھمکیاں دیں۔
مقدمہ متن میں کہا گیا ہے کہ مظاہرین نے نعرے لگائے کہ ہم فیصلہ نہیں ہونے دیں گے اور نہ ہی انہیں کام کرنے دیں گے جبکہ مظاہرین نے ٹائر جلا کر راستے بھی بند کیے۔ مقدمے میں پی ٹی آئی کے جھنڈے اٹھانے والے ایک سو سے زائد نامعلوم افراد کو بھی نامزد کیا گیا ہے۔
مقدمہ ایس ایچ او تھانہ سیکرٹریٹ کی مدعیت میں درج کیا گیا اور وکیل مصطفین کاظمی کو مقدمہ میں نامزد ہونے پر گرفتار کیا گیا ہے جبکہ دیگر نامزد ملزمان کی گرفتاری کا بھی امکان ہے۔
