ویب ڈیسک: ق لیگ کے ایم این اے طارق بشیر چیمہ نے قومی اسمبلی اجلاس کے دوران تلخ کلامی کے بعد پی ٹی آئی کی رکن قومی اسمبلی زرتاج گل سے معافی مانگ لی ۔
ذرائع کے مطابق زرتاج گل نے طارق بشیر چیمہ کی معافی قبول کرلی، اسپیکرقومی اسمبلی ایازصادق نے دونوں کے درمیان معاملہ ختم کر ایا،طارق بشیمہ چیمہ زر تاج گل سے کل اسمبلی اجلاس کے دوران بھی معذرت کریں گے ۔
ذرائع کا کہنا ہے کہ اپوزیشن لیڈر عمرایوب نے سپیکر کا شکریہ ادا کیا، پی ٹی آئی اراکین سمیت تمام فریقین نے اسپیکر کے کردار کو سراہا۔
قومی اسمبلی کے اجلاس میں طارق بشیر چیمہ کی تقریر کے دوران زرتاج گل بہاولپور کا ذکرکرتی رہیں، وہ طارق بشیر کو بہاولپور یونیورسٹی تصویر اسکینڈل کا حوالہ دیتی رہیں۔
تقریر کے بعد طارق بشیر نے زرتاج گل کی نشست پر جاکر انہیں مبینہ طور پر کچھ نازیبا الفاظ کہے۔
جس کے بعد سنی اتحاد کونسل کے ارکان غصے میں آکر طارق بشیر چیمہ کی طرف لپکے ، تاہم طارق بشیر کو آغا رفیع اللہ ایوان سے باہر لے گئے۔
قومی اسمبلی کے اجلاس میں بشیر چیمہ کی جانب سے زرتاج گل کو نازیبا الفاظ کہنے پر سنی اتحاد کونسل کے ارکان نے ہنگامہ آرائی کی اور احتجاج کیا۔
