ویب ڈیسک: وفاقی حکومت نے ضم اضلاع کے لئے ٹیکس چھوٹ ختم کرنے کا اعلان کرتے ہوئے واضح کیا ہے کہ سابق فاٹا اور پاٹا بھی اب ٹیکس نیٹ میں آئیں گے۔
وفاقی وزیر خزانہ محمد اورنگزیب نے کہا ہے سابقہ پاٹا اور فاٹا کی ٹیکس اور ڈیوٹی چھوٹ کا استثنیٰ 30جون کو ختم ہونے جا رہا ہے، 6سال سے استثنیٰ چل رہا ہے جسے واپس لیا جا رہا ہے، ان میں کوئی نئی قانون سازی تجویز نہیں کر رہے۔
قومی اسمبلی میں وزیر خزانہ نے سابقہ پاٹا اور فاٹا کی ٹیکس اور ڈیوٹی چھوٹ واپس لینے کی تجویز پر توجہ دلا نوٹس کے جواب میں کہا کہ پچیسویں آئینی ترمیم کے بعد ٹیکس لا فاٹا اور پاٹا پر بھی نافذ ہوئے۔ ان علاقوں کو 2023 تک سیلز ٹیکس اور انکم ٹیکس کی چھوٹ دی گئی، پھر ان علاقوں کو ایک سال کا مزید استثنیٰ دیا گیا جو 30 جون کو ختم ہونے جا رہا ہے ۔
انہوں نے کہا کہ ان میں کوئی نئی قانون سازی تجویز نہیں کر رہے ، اب یہ ٹیکس چھوٹ واپس لی جا رہی ہے۔
اس پر سنی اتحاد کونسل کے رہنما سلیم رحمان نے کہا کہ ہم اس طرح یہ ٹیکس نہیں دیں گے، ہم احتجاج کریں گے، کشمیر میں جو احتجاج ہوا ہے اس سے زیادہ کریں گے ۔
اسد قیصر نے کہا کہ کیا سابقہ پاٹا فاٹا ان برے حالات سے نکل آئے ہیں؟ ابھی بھی وہاں گولہ باری جاری ہے،40سال سے جنگ میں ان علاقوں کی معیشت تباہ ہو گئی ہے،ان علاقوں کی معیشت تباہ ہو چلی ہے۔
