ویب ڈیسک: وفاقی وزارت داخلہ کی جانب سے بلٹ پروف گاڑی خریدنے کے حوالے سے پالیسی جاری کردی گئی ۔
وفاقی وزارت داخلہ کے مطابق پالیسی پورے ملک میں نافذ کردی گئی ہے، جس کے مطابق انفرادی طور پر یا کمپنی کو بلٹ پروف گاڑی خریدنے کے لیے شرائط نافذ کردی گئی ہیں۔
پالیسی کے مطابق کوئی بھی کمپنی 30 کروڑ روپے اور انفرادی شخص 3 کروڑ روپے ٹیکس دینے پر بلٹ پروف گاڑی خریدنے کا اہل ہوگا۔
وفاقی وزارت داخلہ کی اجازت سے بلٹ پروف گاڑی خریدی یا فروخت کی جاسکتی ہے، 30کروڑ ٹیکس دینے والے کو 2 گاڑیاں 50 کروڑ تک ٹیکس دینے والے کو 3 گاڑیاں لینے کی اجازت دی جائے گی۔
پالیسی کے مطابق ایک ارب روپے ٹیکس دینے والے کو 4 گاڑیاں، ایک ارب سے زائد ٹیکس دینے والے کو 6 گاڑیاں خریدنے کی اجازت ہوگی، بلٹ پروف گاڑی کی 6 ماہ میں ٹیکس کی ادائیگی نا ہونے پر بلٹ پروف گاڑی کا اجازت نامہ منسوخ ہوگا۔
صوبائی محکمہ ایکسائز بلٹ پروف گاڑیوں کی رجسٹریشن کرنے کا مجاز ہوگا، بلٹ پروف گاڑیوں کا ڈیٹا وزارت داخلہ کو فراہم کیا جائے گا۔
پالیسی میں ریاست مخالف افراد، قتل، اغوا ، ڈکیتی کے ملزمان کو بلٹ پروف گاڑی خریدنے کے لیے نااہل قرار دیا گیا ہے۔
بلٹ پروف گاڑی خریدنے والے افراد کی خفیہ اداروں سے سکیورٹی کلیئرنس بھی لازمی قرار دے دی گئی ہے۔
