ویب ڈیسک: تحریک انصاف (پی ٹی آئی ) کی کور کمیٹی نے خیبر پختونخوا میں کسی قسم کے فوجی آپریشن کی مخالفت کر دی۔
اس حوالے سے پارٹی کی کور کمیٹی کا ہنگامی اجلاس منعقدا جس میں وزیر اعلیٰ خیبر پختونخوا علی امین گنڈا پور سمیت اہم رہنمائوں نے شرکت کی، اجلاس میں ممبران نے آپریشن کی بھر پور مخالفت کی۔
وزیر اعلیٰ علی امین گنڈا پور نے بریفنگ دیتے ہوئے خیبر پختونخوا میں دہشتگردی سے متعلق آپریشن پر موقف کمیٹی کے سامنے رکھا۔
وزیر اعلیٰ نے کہا کہ کسی بھی میٹنگ میں آپریشن سے متعلق فیصلہ نہیں ہوا، اگر آپریشن سے متعلق کوئی فیصلہ ہوا ہو تو میٹنگ منٹ سامنے لائے جائیں، میری ملاقاتوں اور میٹنگز میں صرف دہشتگردی پر گفتگو ہوئی فیصلے نہیں ہوئے۔
علی امین گنڈا پور نے کہا کہ خیبرپختونخوا ایک اور آپریشن کا متحمل نہیں ہو سکتا، جھوٹے پروپیگنڈے پھیلانے کی بجائے حقائق پر بات کی جائے۔
انہوں نے مزید کہا کہ بانی پی ٹی آئی عمران خان سے ملاقات کروں گا، کور کمیٹی نے علی امین گنڈا پور پر اعتماد کا اظہار کر دیا۔
