ویب ڈیسک: بانیٔ پی ٹی آئی و دیگر رہنماوں پر آزادی مارچ سے متعلق تھانہ آبپارہ میں درج 2 مقدمات میں درخواستِ بریت پر ڈسٹرکٹ اینڈ سیشن کورٹ اسلام آباد نے فیصلہ محفوظ کر لیا۔
ذرائع کے مطابق درخواستِ بریت پر سماعت جوڈیشل مجسٹریٹ یاسر محمود نے کی۔ اس دوران پی ٹی آئی وکلاء سردار مصروف اور آمنہ علی نے بانیٔ پی ٹی آئی، شاہ محمود قریشی اور فیصل جاوید کی درخواستِ بریت پر دلائل دیئَے۔
سردار مصروف ایڈووکیٹ نے ڈسٹرکٹ اینڈ سیشن کورٹ میں اپنے دلائل میں کہا کہ ایف آئی آر مجاز اتھارٹی کی جانب سے درج نہیں کرائی گئی۔
ان کا کہنا تھا کہ اگر آزادی مارچ کے حوالے سے درج مقدمات کے ٹرائل ہو بھی جائیں تو سزا کے امکانات نہیں۔
سردار مصروف ایڈووکیٹ نے عدالت کو بتایا کہ سوائے جھنڈوں کے پراسیکیوشن کے پاس کوئی ثبوت نہیں۔
