کرنٹ سے اموات

کرنٹ سے اموات پر ڈسکوز قصوروار قرار ،کروڑوں کا جرمانہ عائد

ویب ڈیسک: نیپرا نے بجلی کے کرنٹ سے ہونے والی اموات پر ڈسکوز کو قصوروار قراردیتے ہوئے بجلی کی چار تقسیم کار کمپنیوں کو 11کروڑ 50 لاکھ روپے کا جرمانہ کر دیا۔
ذرائع کے مطابق گزشتہ مالی سال میں لیسکو، پیسکو، فیسکو اور سیپکو کے علاقوں میں 70 افراد کرنٹ لگنے سے جاں بحق ہوئے۔
جاں بحق ہونے والوں میں 46 بجلی کی تقسیم کار کمپنیوں کے ملازم تھے جبکہ 24 شہری کرنٹ لگنے کے باعث جان کی بازی ہار بیٹھے۔
نیپرا نے بجلی کی تقسیم کار کمپنیوں کے جواب کو مسترد کرتے ہوئے کمپنیوں کو متاثرہ خاندانوں کو 40لاکھ روپے ادا کرنے اور ہر خاندان کو ایک نوکری دینے کا حکم دے دیا۔
نیپرا نے لیسکو کو 2 کروڑ 30 لاکھ روپے جرمانہ کیا، لیسکو کے علاقے میں گزشتہ سال کرنٹ لگنے سے 11 افراد جاں بحق ہوئے۔
پیسکو کو 6 کروڑ 20 لاکھ جرمانہ کیا گیا ، گزشتہ سال پیسکو کے علاقے میں کرنٹ لگنے سے سب سے زیادہ 41 اموات ہوئیں۔
نیپرا نے سیپکو کو ایک کروڑ پچاس لاکھ روپے جرمانہ کیا، سیپکو کے علاقے میں گزشتہ سال کرنٹ لگنے سے 9 افراد اپنی جان گنوا بیٹھے۔
فیسکو کو نیپرا نے ایک کروڑ پچاس لاکھ روپے جرمانہ کیا، فیسکو کے علاقے میں گزشتہ سال کرنٹ لگنے سے 11 افراد جاں بحق ہوئے۔
نیپرا کی جانب سے بجلی کی تقسیم کار کمپنیوں کو جرمانہ 15 دن کے اندر ادا کرنے کی ہدایت کی گئی ہے۔

مزید پڑھیں:  وزیراعلیٰ خیبرپختونخوا کی عمران خان سے ملاقات، اہم امور پر گفتگو