ویب ڈیسک: قومی اسمبلی میں قائد حزب اختلاف اور پی ٹی آئی رہنماء عمر ایوب سے جنوبی وزیرستان کے مشران جرگہ نے ملاقات کی اور انگور اڈہ بارڈر بند ہونے کے باعث درپیش مسائل سے آگاہ کیا۔
ملاقات میں تحریک تحفظ آئین پاکستان کے سربراہ محمود اچکزئی اور سابق سپیکر اسد قیصر بھی موجود تھے، جرگہ میں جنوبی وزیرستان کے وزیر اور محسود قبیلے کے مشران شریک ہوئے۔
اپوزیشن لیڈر نے معاملہ قومی اسمبلی میں اٹھانے کی یقین دہانی کرائی جبکہ وفد نے اپوزیشن لیڈر کو اسلام آباد میں تین روزہ قبائلی جرگہ میں شرکت کی دعوت بھی دی۔
اپوزیشن رہنمائوں نے قبائلی جرگہ میں شرکت کی دعوت قبول کرلی۔
جرگہ مشران قبائلی نے کہا کہ تحریک تحفظ آئین پاکستان کے ممبران کو سابق فاٹا کے دورے کی دعوت دیتے ہیں۔
اپوزیشن لیڈر عمر ایوب خان نے کہا کہ عوام کے تمام مسائل حل کرنا ہماری ترجیحات میں شامل ہے، معاملہ قومی اسمبلی اور وزارت داخلہ کے سامنے رکھیں گے
۔عمر ایوب خان نے مزید کہا کہ یہ پاکستان کے محب وطن عوام کے مستقبل کا مسئلہ ہے، حکومت کو قبائلی اضلاع کے عوام کے مطالبات کو سنجیدگی سے لینا ہوگا، اگر مسائل حل نہ ہوئے تو عوام کا ریاست سے اعتماد اٹھ جائے گا۔
اسد قیصر نے کہا کہ بحیثیت سپیکر انگور اڈا، غلام خان اور خرلاچی بارڈرز کے مسائل کے حل کیلئے خصوصی کمیٹی تشکیل دی، قبائلی اضلاع کے عوام کے مسائل کیلئے ہر فورم پر آواز اٹھائوں گا، اگر مسائل حل نہ کئے گئے تو سڑکوں پر آئیں گے۔
محمود خان اچکزئی نے گفتگو کرتے ہوئے کہا کہ پاکستان ہمارا ملک ہے، ہم کسی کے خلاف نہیں ہیں، قبائلیوں نے اس ملک کیلئے لازوال قربانیاں دی ہیں، ہم اس جرگے کے تمام مطالبات سے متفق ہیں، قبائلیوں کے حقوق کیلئے اسمبلی اور اسمبلی سے باہر جدوجہد کریں گے۔
