ویب ڈیسک: آئی سی سی ٹی 20 ورلڈ کپ 2024 کے سپر 8 مرحلے میں ٹائیگرز کو کینگروز کے ہاتھوں شکست کا سامنا کرنا پڑا۔ میچ کا فیصلہ ڈک ورتھ لوئس میتھڈ کے تحت ہوا جس میں کینگروز 28 رنز سے کامیاب رہے۔
ٹی 20 ورلڈ کپ کے سپر 8 راونڈ میں ٹاس جیت کر آسٹریلیا نے بنگلہ دیش کی ٹیم کو پہلے بیٹنگ کی دعوت دی۔
بنگال ٹائیگرز نے پہلے بیٹنگ کرتے ہوئے مقررہ 20 اوورز میں کپتان نجم الحسین کے 41 رنز کی بدولت 8 وکٹوں کے نقصان پر 140 رنز بنائے۔
آسٹریلیا کی جانب سے پیٹ کمنز نے میگا ایونٹ کی پہلی ہیٹرک اپنے نام کی۔
ان کے علاوہ ایڈم زیمپا نے 2، مچل سٹارک، مارکس سٹوئنس اور گلین میکس ویل نے ایک، ایک وکٹ حاصل کی۔
بنگلا دیش کے 141 رنز کے ہدف کے تعاقب میں آسٹریلیا کی ٹیم نے 11 اوورز میں 2 وکٹوں کے نقصان پر 100 رنز بنائے تھے کہ بارش کے باعث میچ روک دیا گیا بعدازاں ڈک ورتھ لوئس میتھڈ کے تحت آسٹریلیا کو فاتح قرار دے دیا گیا۔
ڈیوڈ وارنر اور ٹریوس ہیڈ نے اوپن کیا۔ ڈیوڈ وارنر نے 53 رنز کی ناقابل شکست اننگز کھیلی۔
ٹریوس ہیڈ 31 اور کپتان مچل مارش صرف ایک رن بنا کر ہی پویلین چلتے بنے جبکہ میکسویل 14 رنز بنا کر ناٹ آؤٹ رہے۔
واضح رہے کہ ورلڈ کپ کے سپر 8 مرحلے کے گروپ اے میں بھارت، افغانستان، آسٹریلیا اور بنگلادیش جبکہ گروپ بی میں انگلینڈ، جنوبی افریقا، امریکا اور ویسٹ انڈیز کی ٹیمیں شامل ہیں۔
