ویب ڈیسک: خیبرپختونخوا کے ضلع کرم میں سکیورٹی فورسز کی چیک پوسٹ پر دہشت گردوں نے حملہ کیا جس کے نتیجے میں ایک ایف سی اہلکار شہید جبکہ 3 زخمی ہوگئے۔
پولیس ذرائع کے مطابق واقعہ وسطی کرم تھانہ مرغان کے علاقے مرغان تانگہ میں پیش آیا جہاں ٹل اسکائوٹس سے تعلق رکھنے والے ایف سی چیک پوسٹ پر دہشت گردوں نے بھاری اور خود کار ہتھیاروں سے حملہ کیا۔
دہشت گردوں کے حملے میں ایک ایف سی اہلکار نائیک مائب زادہ شہید جبکہ 3اہلکار لانس نائیک لیاقت، لانس نائیک اشتیاق اور لانس نائیک مسعود زخمی ہوگئے ۔
حملے میں جاں بحق ہونے والے اہلکار کی نعش اور زخمیوں کو قریبی ہسپتال پہنچا دیا گیا۔
حملے کے بعد سکیورٹی فورسز نے حملہ آوروں کے خلاف بھرپور جوابی کارروائی کی جس کے بعد حملہ آور علاقے سے فرار ہوگئے۔
پولیس ذرائع کے مطابق کرم میں گزشتہ کئی ماہ سے سکیورٹی فورسز کی چیک پوسٹوں اور سرکاری املاک پر حملوں کا سلسلہ جاری ہے۔
