بی آر ٹی سے 168ارب ریکوری

نیب انکوائری کا بی آر ٹی سے 168ارب ریکوری کا دعویٰ

ویب ڈیسک: قومی احتساب بیورو (نیب) نے انکوائری کی مد میں بی آر ٹی سے 168ارب ریکوری کا دعویٰ کردیا۔
اعلامیے میں کہا گیا ہے کہ نیب نے 25 سالہ تاریخ میں بی آرٹی پروجیکٹ میں سب سے بڑی ریکوری کی، نیب خیبرپختونخوا نے بی آرٹی پشاور معاملے میں168.5 ارب روپے کی بڑی بالواسطہ ریکوری کی۔
اعلامیے میں بتایا گیا ہے کہ نیب نے عالمی ثالثی عدالت سے کنٹریکٹرز کا 31.5 ارب روپے کا دعویٰ بھی خارج کروایا۔
اعلامیے کے مطابق بی آر ٹی پشاور منصوبے کی تحقیقات کا آغاز 2018 میں ہوا، تحقیقات میں بی آرٹی کے کنٹریکٹ کی غیرقانونی ایوارڈنگ اورسرکاری فنڈزمیں خرد برد کے الزامات سامنے آئے۔
نیب کی حالیہ قیادت نے تحقیقات کو تیزکیا تو108.5 ارب روپے کی بچت ہوئی اور تحقیقات میں ثابت ہوا کہ کنٹریکٹ میں شامل 6 منصوبے غلط طریقے سے چند مخصوص کمپنیوں کودیے گئے۔
نیب کا کہنا ہے کہ کمپنیوں نے معاہدے کی خلاف ورزی کی اور تقریباً ایک ارب روپے بغیرکام کے حاصل کیے، نیب تحقیقات میں400 سے زائد بینک اکانٹس کا بھی معائنہ کیا گیا جس سے مزید شواہد ملے۔
اس دوران کنٹریکٹرز نے پشاور ڈیویلپمنٹ اتھارٹی کو جعلی گارنٹیاں جمع کرائی تھیں، پی ڈی اے کے دعوے کے مطابق 86 ارب روپے کا ہرجانہ بھی طلب کیا گیا۔
کنٹریکٹرز نے نہ تو کام 6 ماہ کی مقررہ مدت میں مکمل کیا نہ ہی غیرملکی کمپنیوں نے پاکستان آکرمنصوبے پرکام کیا۔
نیب کے مطابق کنٹریکٹرز نے بوگس آڈٹ رپورٹ جمع کرائی جبکہ ایس ای سی پی نے اس بوگس آڈٹ رپورٹ کی تصدیق بھی کی، نیب نے غیرملکی کمپنیوں کو ان کے سفارتخانوں کے ذریعے شامل تفتیش کیا۔
کنٹریکٹرز نے سود کی ادائیگی کی بنیاد پر5 ارب کا دعویٰ بھی کیا، نیب تحقیقات کی وجہ سے پروجیکٹ کو اصلی لاگت پرمکمل کرواکرقومی خرانے کی 9 ارب کی بچت کی گئی۔
اعلامیے میں بتایا گیا ہے کہ نیب کی کارروائیوں کی بدولت یہ پروجیکٹ اصل لاگت پرمکمل کرکے مزید 9 ارب روپے کی بچت کی گئی۔
نیب کی تحقیقات کی وجہ سے کنٹریکٹرز نے پی ڈی اے کیساتھ عدالت سے باہر تصفیے کی درخواست کی، تصفیے کے نتیجے میں صرف2.6 ارب روپے کی ادائیگی پرمعاہدہ طے پایا۔
اس معاہدے کے بعد پشاور ہائیکورٹ نے تمام کیسز بند کردیئے۔
اعلامیے میں مزید کہا کہ نیب نے 2018 میں بی آرٹی پشاورکے غیرقانونی کنٹریکٹ دینے،سرکاری خزانے میں خورد برد پرتحقیقات کا آغازکیا تھا۔
یاد رہے کہ قومی احتساب بیورو (نیب) نے انکوائری کی مد میں بی آر ٹی سے 168ارب ریکوری کا دعویٰ کردیا۔

مزید پڑھیں:  لاہور جلسہ کیلئے وزراء و ممبران کو ہزاروں کارکنان ساتھ لانے کی ہدایت