ویب ڈیسک: لاپتا روسی ہیلی کاپٹر کا ملبہ تلاش کر لیا گیا، 17 لاشیں بھی برآمد کر لی گئیں۔
تفصیلات کے مطابق لاپتا روسی ہیلی کاپٹر کا ملبہ تلاش کرنے کے ساتھ ساتھ ملبے سے 17 لاشیں بھی برآمد کر لی گئی ہیں۔
عالمی ذرائع ابلاغ کے مطابق ہفتے کو روس کا ایک ہیلی کاپٹر ملک کے مشرق بعید کے علاقے میں واقع جزیرہ نما کامچاتسکی میں اڑان بھرنے کے کچھ ہی دیر بعد لاپتا ہوگیا تھا۔
ذرائع کے مطابق ہیلی کاپٹر پر 19 سیاح اور عملے کے تین افراد سوار تھے۔ روسی حکام کے مطابق ہیلی کاپٹر کے ملبے اور اطراف سے 17 لاشیں ملی ہیں جبکہ باقی پانچ کی تلاش کی جارہی ہے۔
اتوار کی صبح ریسکیو ٹیموں کو پہاڑی علاقے میں ہیلی کاپٹر کا ملبہ پہاڑی ڈھلوان پر بکھرا ہوا نظر آیا جس کے بعد وہاں فوری ریسکیو ٹیمیں پہنچیں، تاہم 22 افراد میں سے 17 کی لاشیں ملیں جبکہ خیال ظاہر کیا جارہا ہے کہ باقی پانچ افراد کے زندہ بچ جانے کے امکانات نہ ہونے کے برابر ہیں اور ان کی لاشیں بھی جلد تلاش کرلی جائیں گی۔
حکام کا کہنا ہے کہ ہیلی کاپٹر کا ملبہ اسی علاقے سے ملا ہے جہاں ریڈار سے ہیلی کاپٹر کا رابطہ منقطع ہوا تھا۔ لاپتا ہونے والا ہیلی کاپٹر ایم آئی ایٹ طرز کا فوجی ہیلی کاپٹر تھا جو روس میں نقل و حمل کے لیے وسیع پیمانے پر استعمال کیا جاتا ہے۔
