ویب ڈیسک: صدر مملکت ڈاکٹر عارف علوی سے پاکستان تحریک انصاف کے ممبران ناراض ہیں۔ تحریک انصاف نے 90 دن میں انتخابات کا معاملہ قانونی طور پر اٹھانے کا فیصلہ کیا ہے۔ ذرائع کا کہنا ہے کہ پی ٹی آئی کے سینئر عہدیداروں نے صدر کے خط اور فیصلے کو بے جان قرار دے دیا، مشاورت اور پیغام بھجوانے کے باوجود صدر نے انتخابات کی تاریخ طے نہیں کی۔ پی ٹی آئی ذرائع کا کہنا ہے کہ صدر مملکت کو آئینی اختیارات کے تحت تاریخ دینے کا پیغام پہنچایا گیا تھا، پارٹی کی قانونی ٹیم کے مشورے کے باوجود صدر نے اپنا اختیار عدلیہ اور الیکشن کمیشن کو سونپا۔ ذرائع کا کہنا ہے کہ صدر کو انتخابات میں کم اخراجات اور سیکیورٹی انتظامات پر بھی پی ٹی آئی نے موقف سے آگاہ کیا تھا، صدر کو تاریخ دینے کا اختیار تھا لیکن یہ تجویز سے زیادہ اختیارات کو اداروں کے حوالے کرنے جیسا عمل ہے۔ پی ٹی آئی ممبران نے کور کمیٹی اجلاس بلا کر معاملے کا از سر نو جائزہ لینے کا فیصلہ کیا ہے۔
