ویب ڈیسک: پاکستان تحریک انصاف نے جسٹس بابر ستار کے خلاف توہین آمیز مہم کا ذمہ دار حکومت کو قرار دے دیتے ہوئے کہا ہے کہ مہم کا مقصد انہیں خوفزدہ کرنا ہے ۔
ترجمان پاکستان تحریک انصاف نے کہا کہ غیر جمہوری عناصر سیاست کے بعد عدلیہ کی تباہی کے ایجنڈے کیلئے سرگرم ہیں، قانون و انصاف کو مقدم رکھنے والے ججز کے خلاف مہم منظم سازش کا حصہ ہے ۔
انہوں نے کہا کہ اس کے پیھچے وہی کردار ہیں جن کی سیاسی تاریخ ججز سے مرضی کے فیصلے لینے سے بھری پڑی ہے، ججز کواپنے گھٹیا پروپیگنڈا کا نشانہ بنانا سپریم کورٹ پر یلغار کرنے والے مافیا کا پرانا وطیرہ رہا ہے۔
ترجمان پی ٹی آئی کا کہنا تھا کہ مجرموں کے اس ٹبر کے نشانے پر ہمیشہ وہ ججز رہے ہیں جنہوں نے عدل و انصاف کے مطابق فیصلے دیئے، مرضی کے ریفری کیساتھ میچ کھیلنے والے مافیا کو رفیق تارڑ اور جسٹس قیوم جیسے ججز ہی بھاتے ہیں۔
انہوں نے مزید کہا کہ بے مثال جرات کا مظاہرہ کرنے والے ججز کو دبا میں لانے کیلئے اوچھے ہتھکنڈوں کی مذمت کرتے ہیں۔
