ویب ڈیسک: اقوام متحدہ کے وفد نے پی ٹی آئی قیادت سے ملاقات کی اور گزشتہ روز حملے میں زخمی ہونے والے رؤف حسن کی خیریت دریافت کی ۔
تفصیلات کے مطابق اقوام متحدہ کا پانچ رکنی وفد رؤف حسن سے ملاقات کے لیے تحریک انصاف کے اسلام آباد میں قائم مرکزی سیکریٹ پہنچا ،وفد میں تین لوگ نیویارک اور دو اسلام آباد آفس سے تھے۔
ملاقات میں چیئرمین پی ٹی آئی بیرسٹر گوہر ،سیکرٹری جنرل عمر ایوب، خالد خورشید اور دیگر رہنما شریک ہوئے۔
قبل ازیں رؤف حسن نے میڈیا سے گفتگو کرتے ہوئے کہا کہ مجھ پر خواجہ سرائوں نے حملہ نہیں کیا بلکہ حملہ آور بہت ہی تربیت یافتہ تھے اور ان کا مقصد میرا گلا کاٹنا تھا تاہم وہ ناکام رہے
انہوں نے مزید کہا کہ آپ ہمیں جان سے ماردیں مگر ہم اپنی جدوجہد اور بیانیے سے پیچھے نہیں ہٹیں گے۔
