صوبہ بھر میں انسداد پولیو مہم کا افتتاح ، 5 روزہ مہم کے دوران 12 لاکھ 99 ہزار بچوں کو پولیو سے بچاو کے قطرے پلانے کا ہدف مقرر کیا گیا ہے۔
ویب ڈیسک: وزیراعلیٰ خیبرپختونخوا نے انسداد پولیو مہم کا افتتاح بچوں کو پولیو سے بچاو کے قطرے پلا کر کر دیا۔ 5 روزہ انسدادِ پولیو مہم یکم سے 5 جولائی تک جاری رہے گی۔
صوبے کے 6 اضلاع صوابی، سوات، ٹانک ، شمالی وزیرستان ، جنوبی وزیرستان لوئر، اور جنوبی وزیرستان اپر میں انسداد پولیو مہم کے دوران بچوں کو قطرے پلائے جائیں گے۔
صوبہ کے 5 اضلاع کی مخصوص یونین کونسلوں میں بھی بچوں کو پولیو سے بچاو کے قطرے پلائے جائیں گے۔
ان میں ڈی آئی خان کی 22 یونین کونسلز، پشاور کی تین جبکہ کرم، بنوں اور لکی مروت کی ایک ایک یونین کونسل شامل ہیں۔
وزیر اعلی خیبر پختونخوا نے 5 روزہ انسداد پولیو مہم کے حوالے سے بتایا کہ مجموعی طور پر 12 لاکھ 99 ہزار بچوں کو پولیو سے بچاو کے قطرے پلانے کا ہدف مقرر کیا گیا ہے۔ اس مقصد کےلئے 9 ہزار 921 ٹیمیں تشکیل دی گئی ہیں۔
سردار علی امین گنڈاپور کے مطابق پولیو ٹیموں کی حفاظت کےلئے تقریباً 15 ہزار سکیورٹی اہلکار تعینات ہونگے۔
صوبائی وزیر اعلی نے کہا کہ حوصلہ افزا بات ہے کہ رواں سال اب تک پولیو کا کوئی کیس سامنے نہیں آیا۔ ہم نے ملک اور خیبرپختونخوا کو پولیو فری بنانا ہے۔ پولیو وائرس کا خاتمہ ہماری حکومت کی اہم ترجیح ہے۔
انہوں نے والدین سے اپیل کی کہ وہ اپنے بچوں کو انسداد پولیو کے قطرے ضرور پلائیں تاکہ انہیں عمر بھر کی معذوری سے بچایا جا سکے۔
وزیراعلیٰ خیبرپختونخوا نے کہا کہ صوبے کو پولیو وائرس سے پاک کرنے کے لیے معاشرے کے تمام طبقات کو کردار ادا کرنا ہو گا۔
سردار علی امین گنڈاپور نے اس موقع پر بتایا کہ فرنٹ لائن پولیو ورکرز ہمارے ہیرو ہیں، والدین گھر گھر جانے والے پولیو ورکز سے مکمل تعاون کریں۔
5 روزانسداد پولیو مہم کے افتتاح کے موقع پر صوبائی وزیراعلیٰ کا کہنا تھا کہ پولیو ڈیوٹی کے دوران اپنی جانیں دینے والے ورکرز اور فورسز کے اہلکاروں کی قربانیوں کو سلام پیش کرتے ہیں۔
