ویب ڈیسک: قومی اسمبلی میں اپوزیشن لیڈر عمر ایوب نے کہا ہے کہ ملک میں قانون نہیں ہے، انٹیلی جنس ایجنسیاں ججز کو زد و کوب کر رہی ہیں۔
قومی اسمبلی میں اظہار خیال کرتے ہوئے عمر ایوب کا کہنا تھا کہ نئے مالی سال کا بجٹ عوام کیخلاف اقتصادی دہشت گردی ہے کیوں کہ وزیراعظم شہباز شریف نے خود اعتراف کیا کہ یہ بجٹ آئی ایم ایف سے مل کر بنایا ہے۔
اپوزیشن لیڈر کا کہنا تھا کہ نجکاری کرنے والے اداروں کو قرض کیوں دیا جا رہا ہے، تیس ارب کی نجکاری رکھی ہے نجکاری کے باقی پروگرام کہاں گئے، قانون کی بالادستی نہ ہونے کی وجہ سے سرمایہ کاری نہیں ہو رہی۔
انہوں نے کہا کہ یہ کابینہ ہے یا سرکس پہلے گندم باہر سے لائے اب وہ ہی گندم باہر بیچنے کی تیاری کی جا رہی ہے، ان کو معیشت کی بنیاد کا نہیں پتا، تیل ،آٹیا ور ڈالر کی قیمتیں بڑھیں گی، صنعتوں کے خلاف بجٹ سے اقتصادی ترقی نہیں ہوسکتی۔
عمر ایوب نے کہا کہ ملک میں قانون نہیں ہے، انٹیلی جنس ایجنسیاں ججز کو زد و کوب کر رہی ہیں، محسن نقوی نے بطور نگران وزیراعلی ساڑھے 4 سو ارب کی گندم درآمد کی تھی، گندم درآمد کرنے کے بعد کاشتکاروں سے خریدی ہی نہیں گئی۔
انہوں نے گندم کی درآمد میں اربوں روپے بنائے معاملے کی نیب سے تحقیقات کرائی جائیں۔
