پشاور: ضلعی انتظامیہ پشاور نے محکمہ صحت کے ہمراہ پیپل منڈی میں کارروائی کرتے ہوئے جعلی ادویات کی بھاری کھیپ برآمد کر لی۔ تفصیلات کے مطابق ڈپٹی کمشنر پشاور کو اطلاع موصول ہوئی تھی کہ پیپل منڈی سے بھاری تعداد میں جعلی ڈیٹول مارکیٹ میں سپلائی کی جا رہی ہے جس پر انھوں نے فوری کارروائی کرنے کی ہدایت کی،
اس حوالے سے اسسٹنٹ کمشنر سٹی نے محکمہ صحت کے چیف ڈرگ انسپکٹر کے ہمراہ پیپل منڈی میں کارروائی کر تے ہوئے ہزاروں کی تعداد میں جعلی ڈیٹول کی بھری بوتلیں برآمدکرتے ہوئے سات دکانوں و گوداموں کو سیل کرتے ہوئے پانچ افراد کو گرفتار کر لیا، یہ افراد جعلی ڈیٹول کو مارکیٹ میں سپلائی کرنے کی کوشش کر رہے تھے،
موقع سے ہزاروں کی تعداد میں ممنوعہ غیر ملکی ادویات اور جعلی ادویات کی بھاری کھیپ بھی برآمد کر لی گئی، ڈپٹی کمشنر کے مطابق گرفتار افراد کے خلاف قانونی کارروائی عمل میں لائی جائے گی۔جبکہ ان افراد سے تفتیش کے بعد مزید کاروائی عمل میں لائی جائے گی۔
