ویب ڈیسک: گزشتہ سانحہ نو مئی کے بعد سے روپوش رہنے والے پاکستان تحریک انصاف کے رہنما حماد اظہر منظر عام پر آگئے ہیں۔
حماد اظہر اسلام آباد میں پاکستان تحریک انصاف کے مرکزی سیکریٹ پہنچے جہاں انہیں دیکھ کر تمام لوگ حیران رہ گئے۔
انہوں نے کہا کہ بانی پی ٹی آئی کی گزشتہ روز ہدایت موصول ہوئی جس میں انہوں نے روپوشی ختم کر کے منظر عام پر آنے اور پنجاب میں پارٹی کی سربراہی سنبھالنے کی ہدایت کی۔
انہوں نے کہا کہ میں عدالتوں پر یقین رکھتا ہوں اور پشاور ہائیکورٹ سے ضمانت قبل از گرفتار حاصل کر کے پھر پنجاب کی عدالتوں میں اپنے مقدمات لڑوں گا، میرے خلاف درج تمام کیسز جعلی اور بے بنیاد ہیں اور امید ہے کہ عدلیہ بھی انصاف کرے گی۔
حماد اظہر نے چیف جسٹس آف پاکستان سے اپیل کی کہ وہ اپنی ریٹائرمںٹ سے قبل ملک میں قائم فسلطائیت کے نظام کو ختم کریں کیونکہ اب قوم کے نوجوانوں کو ان سے ہی امیدیں ہیں اور وہ یہ کام کر کے امر ہوسکتے ہیں۔
پی ٹی آئی رہنما نے رئوف حسن پر ہونے والے حملے کی مذمت کرتے ہوئے کہا کہ ان کے ساتھ پیش آنے والے واقعے کے بعد مجھے خان صاحب کا روپوشی ختم کر کے منظرعام پر آنے کا پیغام ملا ۔
اس سے قبل ہدایت تھی کہ گرفتاری سے ہر صورت بچنا ہے کیونکہ مجھ پر تشدد ہوسکتا تھا، جلد مراد سعید سمیت دیگر رہنما بھی منظر عام پر آئیں گے۔
دوسری جانب ٹی وی پر حماد اظہر کی موجودگی کی خبر سنتے ہی وفاقی پولیس بھی حرکت میں آگئی۔
ذرائع کے مطابق پولیس اہلکار حماد اظہر کو گرفتار کرنے پی ٹی آئی سیکرٹریٹ پہنچ گئے
حماد اظہر پولیس اہلکاروں کے پہنچنے سے قبل ہی پشاور روانہ ہو گئے ۔
ذرائع نے بتایا کہ وفاقی پولیس کے اہلکاروں کی جانب سے سیکرٹریٹ سٹاف سے پوچھ کچھ گئی ۔
