ویب ڈیسک: احتساب عدالت راولپنڈی نے نئے توشہ خانہ کیس میں پاکستان تحریک انصاف کے بانی چیئرمین عمران خان اور بشریٰ بی بی کے جوڈیشل ریمانڈ میں 16ستمبر تک توسیع کردی ۔
اڈیالہ جیل میں احتساب عدالت کے جج ناصر جاوید رانا نے کیس کی سماعت کی ۔
تحریک انصاف کے بانی چیئرمین عمران خان اور ان کی اہلیہ بشریٰ بی بی کے وکیل سلمان صفدر، انتظار پنجوتھہ اور خالد یوسف چودھری عدالت پیش ہوئے۔
نیب پراسیکیوٹر جنرل سردار مظفر عباسی، عمیر مجید عدالت میں پیش ہوئے۔
عمران خان اور بشریٰ بی بی کو بھی اڈیالہ جیل سے کمرہ عدالت میں پیش کیا گیا۔
سماعت کے دوران فریقین کے وکلا نے دلائل دیئے، وکیل صفائی بیرسٹر سلمان صفدر نے کہا کہ بانی پی ٹی آئی اور بشری بی بی کے خلاف توشہ خانہ کا نیا ریفرنس پہلے ریفرنس جیسا ہی ہے، ایک ہی طرح کے الزام میں دو ریفرنس نہیں بنائے جاسکتے۔
نیب پراسیکیوٹر نے کہا کہ دستاویزات سے ہی ثابت ہوسکتا ہے کہ نیا ریفرنس پہلے ریفرنس سے مشابہت رکھتا ہے یا نہیں، نیب پراسیکیوٹر نے توشہ خانہ کے پرانے ریفرنس کا جوڈیشل ریکارڈ طلب کرنے کی درخواست دائر کر دی۔
عدالت نے فریقین کے دلائل سننے کے بعد نیب کی جوڈیشل ریکارڈ طلب کرنے کی درخواست مسترد کر دی۔
احتساب عدالت نے بانی پی ٹی آئی عمران خان اور بشری بی بی کے جوڈیشل ریمانڈ میں بھی 16 ستمبر تک توسیع کردی۔
عدالت ملزمان کی ضمانت بعد از گرفتاری کی درخواستوں پر 6 ستمبر کو سماعت کرے گی۔
