وفاقی وزیر خارجہ مخدوم شاہ محمود قریشی نے بھارت سے 9 مارچ کو پاکستان میں میزائل گرنے کے واقعے کی مشترکہ تحقیقات کرانے کا مطالبہ کیا ہے۔
تفصیلات کے مطابق وزیر خارجہ شاہ محمود قریشی نے اقوام متحدہ کے سیکرٹری جنرل انتونیو گوتریس سے ٹیلی فون پر گفتگو کرتے ہوئے کہا کہ واقعہ بھارت کے غیر ذمے دار رویے کو ظاہر کرتا ہے تاہم سلامتی کونسل اور عالمی برادری سنجیدگی سے نوٹس لے۔
یہ بھی پڑھیں: وفاقی حکومت کا ریڈزون کی سکیورٹی رینجرز کے حوالے کرنے کا فیصلہ
علاوہ ازیں وزیر خارجہ نے جرمن ہم منصب اینالینا بیئربوک سے ٹیلیفونک گفتگو کرتے ہوئے کہا کہ بھارت کا پاکستان میں میزائل گرنے کو غلطی تسلیم کرنا کافی نہیں ہے۔ انہوں نے جرمن ہم منصب کو یوکرین کی صورت حال پر پاکستان کی تشویش سے بھی آگاہ کیا۔
دوسری جانب شاہ محمود قریشی نے ایران کے وزیر خارجہ ڈاکٹر حسین امیر عبداللہیان سے بھی گفتگو میں مقبوضہ کشمیر پر بھارتی قبضے کے خلاف اور کشمیری عوام کی مسلسل حمایت پر ایرانی قیادت کا شکریہ ادا کیا۔
