ویب ڈیسک: ناقص اور غیر معیاری گوشت کی سپلائی روکنے کیلئے محکمہ خوراک کی جانب سے کارروائی کی گئی۔
اس دوران شہر بھر کو سپلائی کی جانیوالی غیر معیاری اور مضر صحت گوشت برآمد کر کے 4 قصائیوں کو گرفتار کر لیا گیا.
یاد رہے کہ 3 ہزار کلو مضر صحت گوشت برآمد کر کے تلف کر دیا گیا اور اس سلسلے میںگرفتار شدگان کیخلاف مقدمات بھی درج کر لئے گئے ہیں۔ ناقص اور غیر معیاری گوشت کے خلاف شہریوں نے کھلی کچہری میں شکایات کے انبار لگا دیئَے۔
سیکرٹری محکمہ خوراک اور ڈائریکٹر فوڈ کو کھلی کچہری کے دوران شہریوں نے شکایت کی تھی کہ پنجاب سے مضر صحت گوشت اور مرغیوں کے پنجروں کو پشاور لا کر مختلف ڈیلرز پر بیچا جاتا ہے جس سے قیمہ تیار کئے جانے کا کاروبار کیا جاتا ہے۔
عوام کی جانب سے یہ بھی کہا گیا کہ اس غیر صحت مند قیمہ کو بعد ازاں کباب اور سیخ کباب وغیرہ کی صورت میں شادی ہالوں کو سپلائی کیا جاتا ہے جس پر انہوں نے متعلقہ حکام کو کارروائی کی ہدایت کی تھی۔
اس حوالے سے راشننگ فوڈ کنٹرولر پشاور جمشید آفریدی کی نگرانی میں ٹیم نے گھنٹہ گھر، سبزی منڈی میں کارروائی کی جہاں پنجاب سے لائی جانیوالی 3 ہزار کلو مضر صحت گوشت برآمد کر کے تلف کر دیا گیا جبکہ اس دوران 4 قصائیوں کو گرفتار بھی کرلیا گیا۔
