پشاور ڈویلپمنٹ اتھارٹی نے ریڑھی بان بچوں پر تشدد اور ان کی ریڑھی پر موجود سبزیاں تلف کرنے پر دو اہلکاروں کو عہدوں سے برخاست کر دیا، پشاور ڈویلپمنٹ اتھارٹی کی جانب سے جاری حکم نامہ میں کہا گیا ہے کہ ڈائریکٹر جنرل پی ڈی اے نے سوشل میڈیا پر وائرل ہونیوالی ویڈیو پر نوٹس لے لیا ہے. جس میں تجاوزات کیخلاف آپریشن کرتے ہوئے غیر منصفانہ اور غیر قانونی طریق کار اپنایا گیا جبکہ ملازمین نے اس عمل کو زبانی طور پر تسلیم بھی کیا ہے .
جس کے بعد ڈائریکٹر جنرل نے اس بات کی تصدیق کردی ہے کہ دونوں ملازمین قواعد کی خلا ف ورزی کے مرتکب قرار پائے ہیں جس کے بعد دونوں ملازمین بلال جاوید اور ذیشان ممریز کو نوکری سے برخاست کر دیا گیا ہے، واضح رہے کہ پی ڈی اے ملازمین کی جانب سے تجاوزات کیخلاف آپریشن کے دوران سبزی فروش بچوں پر تشدد کیا گیا تھا اور ریڑھی پر موجود سبزیاں بھی پھینک دی گئی تھیں۔