ویب ڈیسک: یوم آزادی میں صرف ایک روز باقی ہے، پورا پاکستان آزادی کے رنگ میں رنگ گیا جبکہ ملک بھر میں ہر طرف سبز ہلالی پرچموں کی بہار آ گئی ہے۔
14 اگست پاکستان کی آزادی کا دن ہے اس کی مناسبت سے ملک بھر میں تیاریاں جوش و خروش سے جاری ہیں ۔
پارلیمنٹ ہاؤس اسلام آباد سمیت ملک بھر کی اہم سرکاری عمارتوں کو رنگ برنگی لائٹوں سے سجا دیا گیا۔
گھروں کی چھتوں، عمارتوں پر قومی پرچم آویزاں ہیں، مارکیٹیں اور بازار جھنڈیوں، بیجز اور آرائشی اشیا سے سج گئے۔
پی ایچ اے نے وطن سے محبت کا اظہار کرتے ہوئے واہگہ بارڈر کے بعد لاہور میں سب سے اونچا پرچم لہرا دیا، جیلانی پارک لاہور میں 200 فٹ اونچا پرچم نصب کیا گیا، آزادی فلوٹ بھی جی ٹی روڈ پر رواں دواں ہے، جگہ جگہ شہریوں کی جانب سے شاندار استقبال کیا جا رہا ہے۔
دوسری جانب جشن آزادی کے سلسلے میں سجائے گئے بازاروں میں گہما گہمی عروج پر ہے، بڑوں کے ساتھ ساتھ بچوں کا جم غفیر بھی بازاروں میں امڈ آیا ہے۔
سٹالز پر بڑے جھنڈے، جھنڈیاں، بچوں کیلئے ماسک، بیجز، گھڑیاں اور ٹوپیاں بھی رکھی گئی ہیں۔
کسی کو گاڑی کیلئے جھنڈا چاہیے تو کوئی موٹرسائیکل پر جھنڈی لگوا رہا ہے، کوئی گھروں کو سجانے کیلئے قومی پرچم خرید رہا ہے تو کوئی چھوٹی جھنڈیاں خریدنے میں مصروف ہے۔
یوم آزادی کی مناسبت سے سبز ہلالی رنگ کے ملبوسات بھی بچوں کی توجہ کا مرکز بنے ہوئے ہیں، بچیاں سبز اور سفید رنگ کی فراکس اور جیولری خریدنے میں مصروف ہیں جبکہ ننھے بچے چاند تارے والی شرٹس خرید رہے ہیں۔
بچوں کا کہنا تھا کہ یوم آزادی بھرپور طریقے سے منائیں گے، سبز اور سفید رنگ کے ملبوسات پہن کر دوستوں کیساتھ انجوائے کریں گے۔
والدین بھی بچوں کو شاپنگ کرانے تک محدود نہ رہے بلکہ 14 اگست کے دن کی افادیت بارے آگاہی فراہم کر رہے ہیں، ان کا کہنا ہے کہ یوم آزادی کی خوشیاں منانے کے ساتھ بچوں میں وطن عزیز سے محبت پیدا کرنا بھی اس خریداری کا مقصد ہے، 14 اگست کو بھرپور جشن ہوگا۔
