پنجاب اسمبلی کے اپوزیشن لیڈر حمزہ شہباز نے کہا ہے کہ اسلام آباد کا پمز اسپتال عمران خان کے قریب ہے، وہاں سے انھیں اپنا چیک اپ کروانا چاہئے۔
تفصیلات کے مطابق حمزہ شہباز نے منگل کے روز لاہور کی احتساب عدالت کے باہر میڈیا سے گفتگو کرتے ہوئے کہا کہ جب سے تحریک عدم اعتماد جمع ہوئی ہے عمران خان کی نیندیں اڑ چکی ہیں اور وہ ہوش کھو چکے ہیں۔ انہوں نے کہا کہ اس وقت ملک ایک نازک مرحلے سے گزر رہا ہے۔
یہ بھی پڑھیں: مریم نواز کی طبیعت ناساز، سوات جلسہ منسوخ
پنجاب اسمبلی کے اپوزیشن لیڈر نے کہا کہ اب عمران خان اراکین قومی اسمبلی کے گھروں کے اندر گھس چکے ہیں۔ انہوں نے کہا کہ وزیر اعظم کو عوام کے پاس جاکر ان کی حالت دیکھنی چاہئے۔ ان کا کہنا تھا کہ عمران خان تو بنی گالہ جاکر بیٹھ جاتے ہیں لیکن اراکین اسمبلی کو عوام میں جانا ہوتا ہے اور ان کا سامنا کرنا پڑتا ہے۔
لیگی رہنما نے مزید کہا کہ سابق وزیر اعظم نواز شریف سے منی لانڈرنگ کا حساب مانگنے والوں کے پاس خود کوئی ثبوت نہیں ہے۔ انہوں نے کہا کہ ایوان صدر آرڈیننس کی فیکٹری بن چکا ہے لیکن تحریک عدم اعتماد کامیاب ہوگی۔