ویب ڈیسک: غزہ میں جاری اسرائیلی بربریت سے متعلق پوسٹ کرنے پر مصری کامیڈین باسم یوسف کا ایکس اکاؤنٹ بند کردیا گیا ۔
11ملین سے زائد فالوورز والے باسم یوسف کا ایکس اکاؤنٹ غیر فعال ہوگیا ہے۔
رپورٹ کے مطابق فلسطین کے حامی باسم یوسف کا اکاؤنٹ غائب ہونے کی وجہ سوشل میڈیا پلیٹ فارم پر اسرائیل مخالف ان کی آخری پوسٹ قرار دی جارہی ہے۔
باسم یوسف اکثر سوشل میڈیا پر اسرائیل اور غزہ تنازعے کے بارے میں اپنے خیالات کا اظہار کرتے رہتے ہیں۔
انہوں نے 19 اگست کو اپنی آخری ایکس پوسٹ میں سام دشمنی کو ہتھیار بنانے پر تبادلہ خیال کیا اور ساتھ ایک پول بھی شامل کیا۔
باسم یوسف نے پوسٹ میں لکھا تھا کہ یہود دشمنی ایک ایسا الزام تھا جو لوگوں کی رگوں میں خون جما دیتا تھا، میں دیکھ رہا ہوں کہ اب بہت سے لوگوں کو یہ احساس ہو رہا ہے کہ اس خوف کے حربے کو گفتگو کو بند کرنے اور لوگوں کو ڈرانے کے لیے کس طرح استعمال کیا جاتا ہے۔
انہوں نے پول شامل کرتے ہوئے صارفین سے پوچھا کہ کیا آپ اب بھی ان صہیونیوں کے ہاتھوں یہود مخالف کہلانے سے ڈرتے ہیں؟اس پوسٹ کے فوری بعد باسم یوسف کا ایکس اکاؤنٹ غیر فعال ہوگیا۔
