پولیس کی تحویل میں طالب علم کی پر اسرار ہلاکت کا واقعہ، وزیر اعلی خیبر پختونخوا محمود خان نے واقعے کا سخت نوٹس لے لیا، آئی جی پی کو واقعے کی غیر جانبدارانہ اور شفاف تحقیقات کرکے رپورٹ پیش کرنے کی ہدایت.
گزشتہ روز مبینہ طور پر کاغذات نہ ہونے کی وجہ سے غربی پولیس اسٹیشن کے اہلکاروں نے ورسک روڈ پشاور کے رہائشی ساتویں جماعت کے طالب علم شاہ زیب کو گرفتار کیا تھا، بعد میں شاہ زیب غربی تھانے میں پر اسرار طور پر جاں بحق ہوگیا تھا.
وزیر اعلی کے نوٹس لینے کے بعد آئی جی پی فوری طور پر متعلقہ تھانے پہنچ گئے، متعلقہ محرر کی گرفتاری عمل میں لائی گئی۔
وزیر اعلی محمود خان کا کہنا ہے پولیس تشدد سے طالب علم کی ہلاکت واقع ہونے کی صورت میں ملوث اہلکاروں کو کسی صورت نہیں چھوڑا جائے گا، ملوث اہلکاروں کو عبرتناک سزا دی جائے گی اور متاثرہ خاندان کو انصاف کی فراہمی یقینی بنائی جائے گی۔
