ویب ڈیسک: خیبر پختونخواکے مشیر اطلاعات بیرسٹر ڈاکٹر سیف نے کہا ہے کہ نواز شریف اور مریم نواز کیمپ شہباز شریف کا دھڑن تختہ چاہتے ہیں۔
مرکز میں حکمران جماعت مسلم لیگ ن میں اختلافا ت کا انکشاف کرتے ہوئے بیرسٹر سیف کا کہنا تھا کہ پی ٹی آئی پر پابندی اور آرٹیکل 6 کا فیصلہ اندرونی کشمکش کی غمازی کرتا ہے۔
انہوں نے کہا کہ ذی شعور شخص اس قسم کے فیصلے نہیں کر سکتا، ملک میں مکمل اندھیر نگری اور چوپٹ راج قائم ہے، عوام نے 8 فروری کو فیصلہ سنایا کہ کون کون غدار اور کون محب الوطن ہے۔
مشیر اطلاعات کا مزید کہنا تھا کہ مریم نواز شہباز شریف سے اس قسم کے انہونی فیصلے کروا کر شہباز شریف کے اقتدار کا خاتمہ چاہتی ہیں۔
موجودہ فیصلے میں بھی نواز شریف اور راج کماری کی چھاپ واضح نظر آتی ہے، مسلم لیگ ن کے اندر اقتدار کی لڑائی اپنے منطقی انجام کو پہنچنے والی ہے۔
بیرسٹر سیف نے کہا کہ سپریم کورٹ فیصلے کے بعد سب سے بڑا غدار چیف الیکشن کمشنر ہے، سپریم کورٹ پر حملہ کرنے والے اور ڈان لیکس والے دوسروں کو غدار کہتے ہیں، شریف خاندان کے خون میں غداری رچ بسی ہوئی ہے، اس وقت آرٹیکل 6 کے سب سے زیادہ مستحق شریف خاندان اور چیف الیکشن کمشنر ہیں۔
مشیر اطلاعات کا کہنا تھا کہ سپریم کورٹ میں مخصوص نشستوں پر جعلی حکومت کو سبکی ہوئی، اب پی ٹی آئی پر پابندی اور غداری کے معاملے پر پھر سے منہ کی کھانی پڑے گی۔
![شہباز شریف کا دھڑن تختہ](https://i0.wp.com/mashriqtv.pk/wp-content/uploads/26-115.jpg?fit=800%2C450&ssl=1?v=1721127546)