ویب ڈیسک: پاکستان تحریک انصاف (پی ٹی آئی ) کی جانب سے چیف الیکشن کمشنر اور دیگر ارکان کے خلاف ریفرنس دائر کردیاگیا۔
پی ٹی آئی کے سینیٹر بیرسٹرعلی ظفر کا کہنا ہے کہ بانی تحریک انصاف عمران خان کی ہدایت پر ریفرنس کے لیے درخواست دائر کردی۔
ریفرنس میں موقف اختیار کیاگیا کہ ہمارا مطالبہ ہے آئین اور سپریم کورٹ کے احکامات کی خلاف ورزی کرنے پرچیف الیکشن کمشنر اور دیگر ارکان کو عہدے سے ہٹایا جائے۔
بیرسٹرعلی ظفر نے کہا کہ الیکشن کمیشن تحریک انصاف اور بانی کے خلاف پارٹی بن چکاہے ہم نے بہت برداشت کرلیا اب وقت آچکا ہے ۔
ذرائع کے مطابق ریفرنس میں انتخابی نشان چھیننا، لیول پلیئنگ فیلڈ نہ دینا، انتخابات مقررہ وقت پر نہ کروانے کے الزامات شامل ہیں۔
ریفرنس میں اسلام آباد کے الیکشن ٹریبونل میں تبدیلی اور سپریم کورٹ کے فیصلے کی غلط تشریح کا حوالہ بھی دیا گیا ہے۔
مسودے میں مخصوص نشستوں پر عدالتی فیصلے کے کچھ نکات بھی شامل کیے گئے ہیں۔
