ویب ڈیسک: پاکستان نے غزہ کے التابین سکول پر اسرائیل کی فوج کے حملے مذمت کرتے ہوئے کہا ہے کہ بے گھر افراد کو پناہ دینے والے اسکول پر حملہ ہولناک، غیر انسانی اور بزدلانہ فعل ہے۔
ترجمان دفتر خارجہ ممتاز زہرہ بلوچ کی جانب سے جاری بیان میں کہا گیا کہ التابین اسکول پر اسرائیلی حملے کے نتیجے میں 100 سے زائد شہری شہید اور متعدد زخمی ہوئے ہیں جوکہ انتہائی افسوسناک واقعہ ہے ۔
ترجمان دفترخارجہ نے کہا کہ شہری آبادیوں اور سہولیات کونشانہ بنانا بین الاقوامی انسانی قانون کی سنگین خلاف ورزی ہے اور جنگی جرم ہے۔
انہوں نے کہا کہ اسرائیل کو ان جنگی جرائم اور غزہ میں نسل کشی کے لیے جواب دہ ہونا چاہیے۔
ممتاز زہرہ بلوچ نے بیان میں مطالبہ کیا کہ عالمی برادری، اقوام متحدہ اور اسرائیل کے حامی غزہ میں فسلطینیوں کی نسل کشی روکنے اور غزہ کے عوام کے تحفظ کے لیے فوری اقدامات کریں۔
خیال رہے کہ اسرائیل نے گزشتہ روز شمالی غزہ کے علاقے الدرج میں پناہ گزین کیمپ میں قائم اسکول میں نماز فجر کے موقع پر 250 سے زائد فلسطینیوں کو نشانہ بنایا تھا اور اسرائیلی بمباری سے 100 سے زائد افراد شہید ہوگئے تھے۔
