ویب ڈیسک: وزیر اعظم میاں شہباز شریف نے کہا ہے کہ عوام کی ترقی و خوشحالی کے معاملے پر سیاست نہیں ہونی چاہئے ۔
اسلام آباد جناح میڈیکل کمپلیکس کا سنگ بنیاد رکھنے کی تقریب سے خطاب کرتے ہوئے وزیر اعظم محمد شہباز شریف نے کہا یہ منصوبہ نوازشریف کی مخلوط حکومت کا تحفہ ہے ،آج ہم سب کو اللہ کے حضور سجدہ شکر بجالانا چاہئے۔
انہوں نے کہا کہ یہ پاکستان کا طبی سہولیات کے حوالے سے اس خطے میں شاندار سینٹر ہوگا، یہ صرف جڑواں شہروں کیلئے نہیں خیبرپختونخوا، آزاد کشمیر، گلگت بلتستان کیلئے بھی ہے، یہ صرف ہسپتال نہیں ،یہاں نرسنگ سکول،لیبارٹریز ،جدید علوم دیا جائے گا۔
وزیر اعظم نے کہا کہ آغا خان فانڈیشن نے کنسلٹنسی مفت دی ہے، اس ہسپتال کیلئے 600کنال زمین مختص کی گئی ہے، یہ وہی ماڈل ہے جس کا پورے پاکستان میں میرے قائد نوازشریف نے اجرا کیا۔
ان کا کہنا تھا کہ اشرافیہ اور صاحب حیثیت کو اللہ نے جائز حلال وسائل دیئے ہیں، اشرافیہ اور صاحب حیثیت دنیا میں کہیں سے بھی علاج کراسکتے ہیں، غریب آدمی علاج کیلئے کہاں جائے گا؟ ہم نے سرکاری ہسپتالوں میں مفت سٹی سکین مشینیں لگائیں، ہم نے لیبارٹری ٹیسٹ پر بھی 10روپے فیس رکھی۔
محمد شہباز شریف نے کہا کہ غریب آدمی کا حق ہے کہ اس کی دہلیز پر تعلیم اور علاج مفت پہنچایا جائے، ایک منصف نے سازش کرکے پی کے ایل آئی کو تباہ کرنے کی بھرپور کوشش کی، پی کے ایل آئی بننے سے پہلے مریض جگر کے علاج کیلئے ہندوستان جاتے تھے۔
انہوں نے کہا کہ گردے کی پیوند کاری کیلئے لاکھوں روپے خرچ ہوتے ہیں، آج پی کے ایل آئی میں گردے کے امراض میں مبتلا مریضوں کا مفت علاج ہوتا ہے، اب یہاں جناح میڈیکل سینٹرمیں مفت علاج ہوگا۔
وزیر اعظم کا کہنا تھا کہ 2011 میں 20،20گھنٹے کی لوڈشیڈنگ ہوتی تھی، میں نے کہا تھا اندھیرے ختم کردیں گے ،اس بات پر بہت مذاق اڑایا گیا، نوازشریف کی قیادت میں 2013سے18تک ملک میں 20،20گھنٹے کی لوڈشیڈنگ ختم ہوئی۔
انہوں نے کہا کہ میں نے منصوبے کی تعمیر کے ذمہ داروں کو کہا ہے مجھے یہ جناح میڈیکل سینٹرایک سال میں مکمل چاہیے، ایک سال بڑا چیلنجنگ ٹائم ہے، یہاں پر 24گھنٹے دن رات کام ہوگا، کل پاکستان کے شاندار آئی ٹی پارک کے دورے پر گیا تھا۔
وزیراعظم شہباز شریف نے کہا کہ ہسپتال کی زمین کے انتقال کیلئے جنہوں نے جدوجہد کی وہ شکریہ کے مستحق ہیں، وزیر خزانہ کا ہمیں ہر وقت شکریہ ادا کرنا چاہیے۔
انہوں نے مزید کہا کہ دنیا کی جدید ترین سہولیات اس ہسپتال میں موجود ہوں گی، امیر اور غریب سب کو اس ہسپتال میں علاج میسر ہوگا، امیر کو یہاں علاج کیلئے پیسے دینے ہوں گے غریب کا مفت علاج ہوگا۔
