ویب ڈیسک: سابق وفاقی وزیر اور رہنما تحریک انصاف فوادچودھری نے کہا ہے کہ گورنر پنجاب کو کسی بھی غیر آئینی اقدام سے باز رہنا چاہیے، اسپیکر کی رولنگ آ چکی ہے اعتماد کا ووٹ آج نہیں لایا جا سکتا۔
میڈیا سے غیررسمی گفتگو کرتے ہوئے فواد چودھری کا کہنا تھا کہ گورنر پنجاب کسی بھی ایڈونچر سے باز رہیں آرٹیکل 109 بالکل واضح ہے اعتماد کا ووٹ آج نہیں لایا جا سکتا، جب تک اجلاس ختم نہ ہو اجلاس نہیں بلایا جا سکتا۔ تحریک عدم اعتماد ناکام ہو گی پی ڈی ایم کا ایک ہی مقصد ہے، الیکشن سے بھاگنا۔
فوادچودھری نے مزید کہا کہ عدم اعتماد ناکام ہونے کے بعد اسمبلیاں تحلیل کر دی جائیں گی اسمبلیوں کی تحلیل کا کام جمعہ سے شروع ہو جائے گا، الگ الگ اسمبلیاں تحلیل نہیں کر رہے، خیبرپخونخوا اور پنجاب اسمبلی دونوں بیک وقت تحلیل کریں گے۔
