ویب ڈیسک:اسرائیلی فضائیہ نےاتوارکی علی الصبح غزہ میں دو مقامات پرحملہ کیاہے۔اسرائیلی فوج کےایک بیان میں کہا گیا ہےکہ آئی ڈی ایف کےلڑاکاطیاروں نے حماس کےایک فوجی کمپائونڈ کونشانہ بنایاجو ہتھیار بنانے اور تربیت کے لیے استعمال کیاجاتا تھا اورساتھ ہی جبالیہ سےملحقہ ایک سرنگ کےداخلی دروازے پر بھی حملہ کیا۔
اسرائیل فورسز کا کہنا ہے کہ یہ حملے حماس کی جانب سے اسرائیلی سرزمین میں آگ لگانے والے غبارے چھوڑنے اور کل ہونے والے پرتشدد ہنگاموں کے جواب میں تھے۔
اے ایف پی کے ایک رپورٹر نے بتایا کہ اسرائیلی فوج نے غزہ اور اسرائیل کی سرحد پر فلسطینیوں کی جانب سے ٹائر جلانے کے بعد آنسو گیس اور ہتھیاروں سے فائرنگ کی۔غزہ میں وزارت صحت نے بتایا کہ جھڑپوں میں 11 فلسطینی زخمی ہوئے ہیں جن میں سے تین آگ سے زخمی ہوئے ہیں۔
اس سے قبل ہفتے کے روز 12 سالہ عمر حسن ابو النائل کو سپرد خاک کر دیا گیا، جو ایک ہفتہ قبل سرحدی جھڑپوں کے دوران اسرائیلی فورسز کی فائرنگ سے زخمی ہونے کے باعث دم توڑ گیا تھا۔
