انٹرنیشنل مانیٹری فنڈ کے ایگزیکٹو بورڈ کی جانب سے 3 ارب ڈالر مالیت کے نو ماہ کے اسٹینڈ بائی ارینجمنٹ (SBA) کی حالیہ منظوری پاکستان کے لیے ایک مثبت پیش رفت ہے۔قبل ازیں متحدہ عرب امارات اور سعودی عرب کی جانب سے بھی دستگیری ہو چکی ہے۔ یہ امداد فوری طور پر اقتصادی دبائو کو کم کرے گی اور اس سے پاکستان کو آنے والے مہینوں میں اپنی برآمدی صلاحیتوں کو بڑھانے اور اپنی معیشت کو مضبوط کرنے کا موقع مل جائے گا ۔ تاہم، یہ تسلیم کرنا بہت ضروری ہے کہ اس طرح کے مواقع بار بار نہیں آتے بلکہ اس موقع کو آخری سمجھا جانا چاہیے، اور انحصار کے چکر سے آزاد ہونے کے لیے پروگرام کے اندر موجود تمام شرائط پر سختی سے عمل کرنا ضروری ہے۔آئی ایم ایف پروگرام کی منظوری بورڈ ممبران کے خدشات کے ساتھ سامنے آئی جنہوں نے پاکستان کی جانب سے اصلاحات کے نفاذ اور وعدوں کے احترام میں مستقل مزاجی کی کمی پر تنقید اور تحفظات کااظہار بھی کیا ماہرین نے اس امداد کے ممکنہ نتائج پر بھی تشویش کا اظہار کیا ہے، کیونکہ یہ اندازہ لگایا جا رہا ہے کہ قرض کی فراہمی کا مسئلہ مزید پیچیدہ ہو جائے گا، جس سے عوام کی بھاری اکثریت پر بوجھ بڑھے گا۔ مزید برآں، بالواسطہ ٹیکسوں، توانائی کی قیمتوں، بڑھتی ہوئی مہنگائی، اور رعایتی شرحوں میں اضافے کے اوسط شہری پربدترین اثرات مرتب ہوں گے۔آئی ایم ایف نے پاکستان کے اقتصادی اصلاحاتی پروگرام کے لیے توجہ کے اہم شعبوں کاجو خاکہ پیش کیا ہے۔ اس میں زیادہ سے زیادہ مالیاتی نظم و ضبط کی ضرورت، مارکیٹ سے طے شدہ شرح مبادلہ، اور توانائی کے شعبے سے متعلق اصلاحات، موسمیاتی لچک اور کاروباری ماحول سے متعلق مزید پیش رفت شامل ہے۔اس پروگرام میں مالیاتی ایڈجسٹمنٹ، قرض کی پائیداری، اور اہم سماجی اخراجات کے تحفظ کے لیے مالی سال 2023-24 کے بجٹ کے نفاذ پر بھی زور دیا گیااس کے تحت بیرونی دبائو کا مقابلہ کرنے کے لیے، مارکیٹ سے طے شدہ شرح مبادلہ پر واپس جانا اور فاریکس مارکیٹ کے ماحول کو یقینی بنانابھی ضروری ہے ایک مناسب طور پر سخت مالیاتی پالیسی جس کا مقصد تنزلی کو کم کرنا اور ساختی اصلاحات پر پیشرفت کرنا ہے جو خاص طور پر توانائی کے شعبے کی عملداری اور موسمیاتی لچک میں، طویل مدتی اقتصادی استحکام کے لیے اہم ہیں۔اس مالی امداد کے ذریعے دی جانے والی عارضی ریلیف کے باوجود، پاکستان کو اپنے معاشی چیلنجوں کی بنیادی وجوہات سے نمٹنے کے لیے ضروری اصلاحات کے نفاذ میں ثابت قدم رہنا چاہیے۔ وعدوں کو پورا کرنے نظام حکومت اور طرز حکومت کو مضبوط بنانے، تعلیم اور ہنر میں سرمایہ کاری اور طویل عرصے سے زیر التوا ڈھانچہ جاتی اصلاحات کو نافذ کرنے سے، پاکستان پائیدار ترقی کی راہ ہموار کر سکتا ہے اور بیرونی امداد پر انحصار کم ہو سکتا ہے۔
