پشاور(نیوزرپورٹر) عوامی نیشنل پارٹی کے صوبائی صدر نے باچا خان ٹرسٹ کیلئے قربانی کی کھالیں مانگ لی ہیں جس پر اے این پی کوتنقیدکانشانہ بنایاجارہاہے۔
ایمل ولی خان کی جانب سے لوگوں کو پیغام دیاگیا ہے کہ اے این پی کے زیر انتظام باچا خان ٹرسٹ کے ذریعے سے صوبہ میں تعلیمی اور صحت کے ادارے چلانے کے ساتھ فلاحی کام بھی کئے جارہے ہیں اس لئے لوگ قربانی کے بعد جانوروں کی کھالیں باچا خان ٹرسٹ کو عطیہ کریں۔
ایمل ولی خان کا یہ ویڈیو پیغام سوشل میڈیا پر شیئر کیا گیا ہے۔ قبل ازیں صوبہ میں مختلف تنظیموں اور رفاعی اداروں کی جانب سے عید کے موقع پر قربانی کی کھالیں جمع کرنے کیلئے لوگوں سے اپیلیں کی جارہی تھیں جماعت اسلامی اور جے یو آئی کے مدرسے بھی کھالیں جمع کرتے ہیں لیکن پہلی مرتبہ ہے کہ اے این پی کے صوبائی صدر کی جانب سے لوگو ں کو قربانی کے جانور وں کی کھالیں دینے کیلئے ویڈیو پیغام جاری کیا گیا ہے.
اے این پی کے صوبائی صدر کی ویڈیو پر سوشل میڈیا پر تبصرے بھی کئے جارہے ہیں اورکہاجارہاہے این پی کامالی بحران شدیدہوگیا ہے ۔بعض صارفین یہ بھی کہہ رہے ہیںکہ جس طرح اے این پی کے ووٹرزمیں کمی آئی ہے اسی طرح قربانی کی کھالوں کے ریٹ بھی خاصی کمی ہے اس لئے یہ اپیل کچھ زیادہ فائدے مند نہیں ہوگی۔
