اپوزیشن پارٹی پاکستان مسلم لیگ ن کے سینیئر نائب صدر شاہد خاقان عباسی نے کہا ہے کہ آئین توڑنے والا اسپیکر ہو، وزیراعظم ہو یا کوئی اور اسے آرٹیکل 6 کا سامنا کرنا پڑے گا۔
تفصیلات کے مطابق سابق وزیراعظم شاہد خاقان عباسی نے اتوار کے روز اسلام آباد میں پریس کانفرنس کرتے ہوئے کہا کہ عدم اعتماد ایک جمہوری اور آئینی حق ہے۔ انہوں نے کہا کہ ملک میں سیاسی، جمہوری اور پارلیمان کا عمل آئین کے مطابق ہونا ضروری ہے۔
یہ بھی پڑھیں: پی ڈی ایم بلاول بھٹو کے حکومت کو دھمکی دینے والے بیان سے پیچھے ہٹ گئی
مسلم لیگ ن کے سینیئر نائب صدر نے کہا کہ تحریک انصاف کی حکومت کو آئین، جمہوری قدروں اور پارلیمان کی پرواہ نہیں اور حکومت نے 14 دن کے اندر اجلاس نہ بلا کر ثابت کر دیا کہ وہ ہرحیلہ بہانہ کریں گے۔ انہوں نے کہا کہ عدم اعتماد کو لٹکایا نہیں جاسکتا، آپ کو سامنا کرنا ہوگا۔
سابق وزیر اعظم نے کہا کہ جو لوگ عمران خان سے منحرف ہیں انھوں نے ہی اسے اقتدار دیا تھا۔ انہوں نے کہا کہ کہ لوگ اقتدار کو چھوڑ کر اپوزیشن میں شامل ہونا چاہتے ہیں۔ ان کا کہنا تھا کہ اسپیکر قومی اسمبلی اسد قیصر پہلے دن سے جانبدار تھا، آج بھی جانبداری کا مظاہرہ کر رہا ہے۔