ویب ڈیسک : چیف جسٹس پشاور ہائیکورٹ نے کہا ہے کہ انتخابات قوم کی امانت اور انتہائی اہم مسئلہ ہے، ہم کسی کو الیکشن میں تاخیر کی اجازت نہیں دیں گے۔
چیف جسٹس محمد ابراہیم خان کی سربراہی میں دو رکنی خصوصی بینچ نے پشاور ہائیکورٹ میں عدلیہ کی نگرانی میں انتخابات کروانے سے متعلق دائر درخواست پر سماعت کی‘ بینچ میں شریک دوسرے جج جسٹس شکیل احمد تھے۔
سماعت کے دوران ایڈوکیٹ جنرل، ایڈیشنل اٹارنی جنرل، وکیل الیکشن کمیشن اور درخواست گزار کے وکیل عدالت میں پیش ہوئے۔
ایڈوکیٹ جنرل عمر جاوید نے کہا کہ اس درخواست میں الیکشن کمیشن کے نوٹیفکیشن کو چیلنج ہی نہیں کیا گیا کیونکہ جب یہ درخواست دائر ہوئی تواس وقت آراوز اور ڈی آر اوز کا نوٹیفکیشن جاری نہیں ہوا تھا۔
چیف جسٹس پشاور ہائیکورٹ جسٹس محمد ابراہیم خان نے ریمارکس دیے کہ لاہور ہائیکورٹ نے تو الیکشن کمیشن کا نوٹیفکیشن معطل کیا ہے۔ جس پر درخواست گزار کے وکیل معظم بٹ نے بتایا کہ جی لاہور ہائیکورٹ نے آر اوز اور ڈی آر اوز کا الیکشن کمیشن کا نوٹی فکیشن معطل کردیا ہے۔
چیف جسٹس نے ریمارکس دیے کہ اس وقت صوبے میں 700 سے زائد تھری ایم پی اوز کے آرڈر جاری کیے گئے ہیں، انتظامیہ کا کوئی اور کام نہیں ہے صرف تھری ایم پی اوز کے آرڈرز جاری کرنے پر دھیان ہے۔
چیف جسٹس نے کہا کہ الیکشن کمیشن کے پاس اختیار ہے جو خلاف ورزی کرتے ہیں ان کے خلاف کارروائی کی جاتی ہے، اب تک کتنے افسران کے خلاف کارروائی کی اور سزا دی؟ اس پر الیکشن کمیشن کے وکیل نے کہا کہ خلاف ورزی کرنے والے متعدد افراد کے خلاف کارروائی ہوئی ہے۔
پشاور ہائیکورٹ کے چیف جسٹس نے کہا کہ الیکشن قوم کی امانت اور انتہائی اہم قومی معاملہ ہے، اس میں تاخیر کی اجازت نہیں دیں گے۔ الیکشن کا جو تاریخ مقرر ہے اس سے نہ ایک دن زیادہ یا کم کریں گے۔
پی ٹی آئی وکلا نے ضمنی درخواست کے لئے مہلت مانگ لی جس پر عدالت نے کہا کہ ضمنی درخواست کے بعد کیس کی مزید سماعت ہوگی۔
