مختلف کمپنیوں کی طرف سے طبی مشینری کی سپلائی غیر قانونی طورپر روک دینے کے باعث سرکاری ہسپتالوں میں آپریشن وغیرہ جزوی طور پر متاثر ہو گئے ہیں۔ قبل ازیں سرجیکل سامان بنانے والی کمپنیوں نے میڈیکل آلات اور مشینری سمیت مختلف میڈیکل سامان کی قیمتوں میں خود ساختہ طور پر اضافہ کیا تھا جس میں حالیہ دنوں کے دوران سپلائی کمپنیوں نے قیمتوں میں مزید اضافہ کردیا ہے ۔ محکمہ صحت کے ذرائع نے بتایا کہ ٹیکسز اور روپے کی قدر کم ہونے کی وجہ سے کمپنیوں اور ہسپتالوں کے درمیان باقاعدہ طور پر کئے گئے معاہدے بھی متاثر ہورہے ہیں اور کمپنیوں نے مذکورہ نرخوں پر سامان کی سپلائی کرنے سے انکار کیا ہے جس کے نتیجے میں ہسپتالوں کیلئے سامان کی خریداری میں بیرون مارکیٹ میں مشکلات کا سامنا ہے ۔
ذرائع کے مطابق بعض کمپنیوں نے معاہدے پر عمل درآمد کرنے کی بجائے ازسر نو معاہدے اورنئے ٹینڈر کرنے کا مطالبہ کیا ہے دوسری طرف سرکاری ہسپتالوں کو میڈیکل آلات کی سپلائی رک جانے کے باعث ہسپتالوں کا آپریشن سسٹم متاثر ہونا شروع ہوگیا ہے جبکہ مقامی سطح پر طبی سامان بھی سابق نرخ کے مطابق دستیاب نہیں۔ ذرائع نے بتایا کہ سنٹرل ریٹ کنٹریکٹ کے تحت یہ مسائل جلد حل کرنے کی کوشش کی جائے گی بصورت دیگر ہیلتھ میں طبی سامان کی خریداری کیلئے کئے گئے تمام معاہدوں پر نظر ثانی اور اس کیلئے فنڈز میں اضافہ ناگزیر ہوگا۔
