ویب ڈیسک: خاتم النبیین حضرت محمد مصطفیٰ ﷺ کی ولادت باسعادت کا دن ، جشن عید میلاد النبی ﷺ آج انتہائی عقیدت و احترام سے منایا جا رہا ہے۔
تمام جہانوں کے سردار نبی کریم حضرت محمد ﷺ کی ولادت کا جشن ملک بھر میں مذہبی جوش وجذبے سے منایا جا رہا ہے۔ ملک بھر میں محافل میلاد النبی ﷺ کا خصوصی اہتمام کیا جا رہا ہے، شمع رسالت کے پروانے اپنے اپنے انداز میں نذرانہ عقیدت پیش کر رہے ہیں، فضائیں دورو و سلام کی صداؤں سے گونج رہی ہیں، چھوٹے بڑے شہروں میں آج ریلیاں نکالی جائیں گی، نذرو نیاز اور لنگر کا بھی خصوصی اہتمام کیا جائے گا۔
حضرت محمد ﷺ کے جشن ولادت پر دن کا آغاز وفاقی دارالحکومت میں 31 جبکہ صوبائی دارالحکومتوں میں 21 توپوں کی سلامی سے ہوا۔ مساجد میں نماز فجر کے بعد مسلم امہ اور ملک و قوم کی سلامتی کے لیے خصوصی دعائیں کی گئیں۔
سرور کونین ﷺ کے جشن ولادت باسعادت کی خوشی کے موقع پر تمام سرکاری وغیرسرکاری عمارتوں پرچراغاں کیا گیاہے جبکہ گھروں، مساجد، دفاتر، مارکیٹوں، بازاروں اور شاہراوں کو برقی قمقموں سے سجایا گیا ہے۔
