مشرقیات

ولیم بلیک نے کہا ہے کہ عظیم کام اس وقت ہوتے ہیں جب کہ انسان اور پہاڑ ملتے ہیں ۔کوئی عظیم کام سڑک پر دھکم دھکا کرنے سے نہیں ہوتا۔
Great things are done when men and mountains meet. This is not done by josting in the streets
ولیم بلیک کی یہ بات صدفی صد درست ہے۔یہ ایک حقیقت ہے کہ بڑے کام کے لیے بڑا عمل درکار ہوتا ہے ۔پہاڑوں کی کٹھن چڑھائی کے بعد آدمی چوٹی پر پہنچتا۔ سڑکوں پر شورو غل کرنے یا جلسوں میں الفاظ کے دریا بہانے سے کوئی بڑا مقصد کبھی حاصل نہیں ہوتا۔حقیقی معنوں میں کوئی بڑا کام انجام پانے کے لیے ضروری ہوتا ہے کہ حالات کو انتہائی گہرائی کے ساتھ سمجھا جائے۔اپنے وسائل اور خارجی امکانات کی پوری رعایت کرتے ہوئے منصوبہ بندی کی جائے ۔سفر شروع کیا جائے تو اس حقیقت کو پوری طرح ملحوظ رکھتے ہوئے کیا جائے کہ راستہ میں دوسرے بہت سے مسافر بھی موجود ہیں۔پھر یہ بھی ضروری ہے کہ آدمی ہر وہ قربانی دے جو اس کا مقصد اس سے تقاضا کرے۔کہیں وہ بال کی قربانی دے اور کہیں وقت کی۔کہیں وہ رائے کی قربانی دے اور کہیں جذبات کی۔کہیں وہ دوسروں سے نمٹے اور کہیں وہ خود اپنا احتساب کرے۔کہیں وہ چلے اور کہیں شدید ہیجان کے باوجود رک جائے۔پہاڑ کی چڑھائی جیسی محنت کئے بغیر کوئی بڑا کام انجام نہیں پاتا ۔ہر بڑا کام بڑی جدوجہد چاہتا ہے ایسا کام جو آدمی کے مرنے کے بعد بھی اپنے مثبت اثرات باقی رکھے۔ایسا کام جو مستقبل کی نقشہ ہے ایسا کام جو تاریخ کے رخ کو موڑ دے ۔بے پناہ محنت چاہتا ہے ۔ایسے کام کے لیے اتھاہ دانش مندی درکار ہے ۔یہی وجہ ہے کہ اس قسم کا کام وہی لوگ کر پانے ہیں جو فی الواقع پہاڑ کی چڑھائی جیسے عمل کا ثبوت دیں۔اس کے برعکس جو لوگ سڑکوں پر شوروغل کرنے کو کام سمجھیں وہ صرف اجتماعی کثافت میں اضافہ کرتے ہیں۔وہ تاریخ کو کوئی حقیقی تحفہ دینے کی توفیق نہیں پاتے۔