لپروسی ٹی بی بلائنڈنس ریلیف ایسوسی ایشن پاکستان کے سرپرست اعلیٰ پروفیسر ڈاکٹر محمد عارف خان نے وزیر اعظم عمران خان سے مطالبہ کیا ہے کہ یوٹیلٹی سٹور کے زیر انتظام چلنے والے سٹوروں میں گھی، کوکنگ آئل، آٹا ،موٹی چینی اور دالوں کی سستے داموں غریب عوام کو فراہمی کو یقینی بنانے کیلئے اقدامات کئے جائیں۔ وزیراعظم عمران خان کو بھیجی جانے والے تحریری درخواستوں میں انہوں نے نشاندہی کی کہ یوٹیلٹی سٹور ملازمین کے مطابق یوٹیلٹی سٹور کارپوریشن کی جانب سے ادائیگیاں نہ ہونے کے سبب رعایتی نرخوں پر گھی، کوکنگ آئل سپلائی کرنے والی فیکٹریوں نے گزشتہ دو مہینوں سے یوٹیلٹی سٹوروں کو گھی اور کو کنگ آئل کی سپلائی بند کر رکھی ہے جس کی وجہ سے عام مارکیٹ میں ضروری اشیاء کی قیمتوں میں بے تحاشا اضافہ کر کے عوام کو لُوٹا جارہا ہے وہاں انتہائی غریب لوگوں میں پریشانی بڑھ گئی ہے.
اس اقدام سے ظاہر ہوتا ہے کہ سوچے سمجھے منصوبہ کے تحت موجودہ حکومت کو بدنام کرنے کیلئے ایسے گھنائونے حربے استعمال کئے جارہے ہیں یوٹیلٹی سٹورز سے رعائتی نرخوں پر دالیں اور دیگر اشیاء بھی گزشتہ دو ماہ سے غائب ہیں ڈاکٹر محمد عارف خان نے وزیر اعظم سے سستے داموں ضروریات زندگی کی اشیاء کی فراہمی اور غریب خریداروں کو سستی اشیاء کے ساتھ زبردستی صابن ،ملک پیک اور دیگر ناقص اشیاء فروخت کرنے والے اہلکاروں کے خلاف بھی سخت کاروائی کرنے کا مطالبہ کیا ہے ۔
