ورلڈ تائیکوانڈو فیڈریشن نے روسی صدر سے اعزازی بلیک بیلٹ واپس لے لی ہے۔
روسی صدر کو 2013 میں جنوبی کوریا کے دورے کے دوران بلیک بیلٹ دی گئی تھی، انہیں تائیکوانڈو کا 9 واں ڈین اور گرینڈ ماسٹر قرار دیا گیا تھا، ورلڈ تائیکوانڈو فیڈریشن کا کہنا ہے کہ تائیکوانڈو نظریات کے تحت امن کو فتح پر فوقیت دی جاتی ہے۔
تنظیم نے ایک بیان میں کہا کہ عالمی تائیکوانڈو کے خیالات یوکرین کے لوگوں کے ساتھ ہیں اور ہم اس جنگ کے پرامن اور فوری خاتمے کی امید کرتے ہیں۔
یہ بھی پڑھیں:ماسکو پر پابندیوں کی حمایت نہیں کرتے، پابندیاں مسائل حل نہیں کرتیں: چین
یاد رہے یہ اعزازی بلیک بیلٹس امریکی صدور کو بھی دی گئی ہیں، جن میں باراک اوباما اور ڈونلڈ ٹرمپ کے نام شامل ہیں۔ گزشتہ روز روسی صدر اور سفیر کے طور پر ان کی جوڈو کی اعزازی حیثیت بھی معطل کر دی گئی تھی۔
خیال رہے روس اور یوکرین کے درمیان 5 روز سے جنگ جاری ہے اور روسی افواج نے یوکرینی دارالحکومت کیف سمیت کئی شہروں کا محاصرہ کر رکھا ہے۔ روس کی جانب سے کی جانے والی جارحیت پر شدید ردعمل دیتے ہوئے امریکہ، برطانیہ اور یورپ کے کئی ممالک نے روسی صدر، متعدد اہم شخصیات اور روس کے مالیاتی اداروں پر مالی پابندیاں عائد کی ہیں۔
