نیشنل اسٹیڈیم کے اندر آگ لگ گئی ہے جسے بجھانے کے لیے فائر بریگیڈ کی دو گاڑیاں روانہ ہوگئی ہیں۔
ذرائع کے مطابق ایچ بی ایل پی ایس ایل 7 ایونٹ کے لیے نیشنل اسٹیڈیم گراؤنڈ میں بنائے جانے والے عارضی کمنٹری باکس میں آگ بھڑک اٹھی۔ آگ پر قابو پانے کے لیے فائر بریگیڈ کو موقع پر طلب کر لیا گیا۔ آگ لگنے سے اسٹیڈیم کے ایک کمنٹری باکس کو نقصان پہنچا جو خاص طور پر پاکستان سپر لیگ (پی ایس ایل) کے میچوں کے لیے بنایا گیا تھا جو 27 جنوری (کل) سے شروع ہونے والے ہیں۔ آگ سے باؤنڈری ایس ایم ڈی کیبل کو بھی جزوی نقصان پہنچا ہے، تاہم کوئی جانی نقصان نہیں ہوا۔
واضح رہے کہ کل سے کراچی کے نیشنل اسٹیڈم میں پی ایس ایل کے ساتویں ایڈیشن کا آغاز ہورہا ہے جس کا ابتدائی میچ کراچی کنگز اور دفاعی چیمپئن ملتان سلطانز کی ٹیموں کے درمیان کھیلا جائے گا۔ نیشنل اسٹیڈیم کراچی میں پہلے مرحلے کے میچز 7 فروری تک جاری رہیں گے جبکہ بقیہ میچز 10 فروری سے لاہور کے قذافی اسٹیڈیم میں کھیلے جائیں گے جبکہ ایونٹ کا فائنل 27 فروری کو ہوگا۔